U MDC ka Tura, u Bernard Marak uwa man leh kam u State BJP Vice President da pynsñiaw u yei pyrchah yei pynkylla ya ka Reservation Policy deiwa ong wa toh u pynneh ka kamwa jooh man hi ko khlem da pynkhih.
Da ong u wai i yabhah 40 la 40 kamwa man katni ymtoh u tba ki neibhah ki Garo hanla em ki boon ngut kiwa da yoh u man Montri Rangbah, ym jooh em pait ki yei pynbha pynku ya ka Garo Hills khamtam ha ka puræ puthi.
Chooh chooh da ong u wa ki bru toh kiwa dooh wa duk kiwa sah ha ki chnong wa cha kdong cha chmiang wei du ka Reservation khamtam ya kiwa lai puræ kawa daw ye u pynku ya ki.
Da ong u leh wa ini wa dep hadien wa da pynkrehkaam da ka Roster System da chem wa em boon ki bhah kreh wa da dooh kiwa toh i bhah ki Garo wei ini pynyoo ko wa ki Montri Rangbah hadooh ki Montri sorkar leh ym em chimkhia ki yeini.
Kamtæ da emkaam wow pynneh yei man salonsar khlem da ktah hadien ha bood iwa daw man kam i kha wym ye mylliñ de.
Neiliang won u MLA warim ka Tura, u John Leslee K Sangma hawa thoh cha ka Expert Committee kawa da thung yow pait deiwi ya kani ka rukom bhah kreh hapoh Meghalaya da ong u wa i bhah ki Garo toh u pynku noh cha ka 50% neidaw wym pu em yoh yoh pura ki yei bhah yong ki ha ki kaam sorkar.
Da ong u leh wa 66.5% kiwa kreh ha ki yung krehkaam ka sorkar toh ki Khasi-Jaiñtia katwa 33.5% toh ki Garo hanla da yabhah mar 40%.
Da pyrchah u leh yei dawa wow kheiñ dei boon paaid hawa pynthymme ya ka Reservation Policy wei da ong u leh cha ka Expert Committee wym toh u chah pynbiej yei dawa pynthymme du deiwa pynhun ya ki seiñ saiñ pyrthai.
Discussion about this post