I yoh psiah ki bru na Assam da pteiñ i hadooh ynne ka sngi wot hadien wa ka sorkar leh da pynbna ko wa ym em kam itæ i psiah i mih ki bru na baar hadooh ynne ka sngi wei khamtam nadooh ka 23 tarik chiteiñ synyaaw hadooh ka 31 tarik uni u bnai da khang lut ya ki khyrdop kiwa psiah cha ka jylla.
Ynne ka sngi neiliang ki dkhot ka Seng Samla Shnong Lumdaitkhla kawa em ha Bhoirymbong, da yoh ki wow ksoh hadooh 3 ngut ki bru wa wan na Assam wei kini ki bru kynthup ki ya uwi u pulit langrut wa 2 ngut ki wakreh ka chnat PWD yong ka sorkar Assam.
U Tyngshain Makri uwa man u President ka Seng Samla Shnong da ong u wa hadien wa ka seiñ da yoh yutip ko na ki paidbah ka chnong wa em ki 3 ngut wa wan na Assam, da lai ki wut-wut cha kani ka thaw wei da chem ki yeiwa sakhiat wei da sñiawphylla ki yeini wa yoh kini ki bru wow poi chapoh ka jylla iwa da wanrah i yei maa yaki paidbah neibhah ha Assam da joor bha kiwa yoh ya u khñiang COVID-19.
Da ong u wa neiliang ka seiñ da beiñ joor ko ya kini ki 3 ngut kiwa da wan psiah khlem ki kot ki sla wow pynsakhiat wa ym em chah ktah ki ha uni u khñiang iwa da booh hei maa wei iwa da pyntieñ ya ki paidbah ka thaaiñ.
Kam wow kdaw heini, ynnin ka sngi ki paidbah ka chnong Mawsikar da khang ki ya ki bru wa wan da ki thuk-thuk kiwa em da ki phaw tylli wa ar tylli ki kari Bolero kiwa wan na Assam kiwa thmu wow psiah chapoh chnong.
Neiliang ki pulit wa ki bor District hadien wa yoh yutip ki hajrong ini, da lai ki wut-wut cha kani ka thaw wow khanglaad ya ini i wan psiah kini ki bru chapoh ka chnong Mawsikar kawa haap ha Langpih, West Khasi Hills.
