Shillong: U Montri wa pait ya ka chnat i chait i khiah, u Alexander Laloo Hek ynne ka sngi da ekti u 3 tylli ki kor Ventilator wa 2 tylli ki kor By-pass cha ka Dr. H Gordon Robert Hospital neibnynta wow sumaar ya kiwa chong chnong kiwa yoh ya u COVID-19.
Kamwa man katni, ha Robert Hospital em soo ngut kiwa yoh ya u COVID-19, wei neiliang u montri hei emlang u Director of Health Services (MI), u Dr. Aman War da ekti u leh ya ki sula yada kam ki PPE ha kani ka sngi.
Neiliang u Hek da ong u wa ka sorkar da yoo ko yei chakri kani ka thaw sumaar, wei toh i kaamram ka sorkar wow pait ya i emkaam næ duna kani ka Hospital.
Heiyatoh won wa i eh i khoo wa chem ki wakreh neidaw wa chah paitkhmat næ ki wymye wow lai liwan cha ki chnong wa cha ka yung ka sem du neidaw wa kreh ki ha ki Hospital, neiliang u Hek da kyrpaad u ya kiwa pynlai chnong wow sñiawthooh yei chakri ki wakreh ha i thaw sumaar, deiwa pynche leh wa ka Hospital ym phah liwan ki ya ki wakreh khlem pyntikna ya i chait i khiah yong ki khamtam wow pyntikna wa ym em chah ktah ki ha u COVID-19.
