Jowai: Ynne ka sngi Musiang kawa man ka sngi wa le yong ka lehniam Behdieñkhlam ki khon ka Raij Jowai da man ko kawa lai bait chirup wei yoh yei yaroh na ka sorkar.
Ynne i sngi kiwa kitkaam niam da pynman ki yei yachem ha Mynkoipyrdi, Loompyrdi Iongpiah heiwa da wan chimbynta da ki kattu katni ngut kiwa chah jied na ki Kmairaij (dorbar chnong) chirup wa ki heh yong ka Seiñ Raij heiwa ha chwa ka yalang wa tbian wa da pynlai da u President ka Seiñraij, u OR Challam wa ki kyntien na u Dolloi ka Elaka, u Puramon Kynjing kamjooh ki kyntien na u General Secretary ka Seiñraij Jowai, u Arwotki Sumer.
Neiliang u OR Challam ha kani ka yalang da pyntip u wa neiliang u Chief Secretary ka jylla, u MS Rao da yaroh u ya ka Raij wa da pynlaibait ko ya ka Lehniam Behdieñkhlam deiwa bood thij ya ki kyndon wa da booh ka sorkar ha kini ki sngi wa dadep yong kani ka lehniam.
Na Myngkoi Pyrdi da mih wow lai cha Iawmusiang chirup wei kbai i kur-iaw deiwa bood leh ya ka Standard Operating Procedure (SOP) deiwa jngai iwi na iwi wei da lai yoohkjat ki cha ki thaw ka Raij kam ha Biar Ka Blai, Madan Datlawakor, Iawmusiang wa Madan Siatthong.
Hadien ini da lai won cha khlieh u Loom-Sooiung heithaw wa jooh pynchong ya ka Khnong Blai heiwa ki Khonraij (Chiliangraij) da e ki ya i ngooh i dem wei neini da mih won wow lai cha madan Pohsawiar wow e ya ki kyntien Ngooh Blai na u Kñi ka kur Nikhla, u Borki Nikhla.
Manda dep i Ngooh Blai na Pohsawiar da ki Kmairaij da liwan ki cha jar jiar ki chnong wow pyndep ya i ngooh i dem ha ki thaw wa jooh pynyieñ ya ki Dieñkhlam.
