Katkam wa pyntip ki pulit, haka 28 tarik uni u bnai, u Changkin G Momin da ujor u wa haka July 11, 2020, da yoo u yaka Advertisement ha OLX wa em wa tyrwa dai yaka thuk thuk heiwa da thied u ka deiwa su T. 63,027 cha ka Google Pay Account yong u Sunil Kumar. Tangwa kani ka thuk thuk ym em poi ko hadooh kattæ leh.
Haka 27 tarik won, u Rana Ch Marak uwa na Sampalgre, Tura (WGH) da ujor u wa haka July 19, 2020 da yoo u ha kawi ka Facebook Page wa tyrwa dai ya kawi ka Mahindra Bolero (NL-07-8208) hei dor T. 2,15,000. Hadien wa yaklam u daka phone ya uwa dai wa kam toh u bru Border Security Force (BSF) wa em ha Nagaland, uwa da phah ya oo wow thap poisa (1) July 20, 2020-T.7,150 (2) July 21, 2020-T.15,999, (3) July 21, 2020- T.25,520 wa (4) July 21, 2020-T.10,520 waroh ha ka Account u Vinay Kumar. Haka July 22, 2020, uwa ujor da yoh phone u na uwa kam toh uwa yah kari uwa phah su 18% ka GST wa poi T. 34,200 heiwa uwa ujor da kyntait u wow su.
Haka 21 tarik, u Treyolangki Siangshai da ujor u wa ha kani ka sngi da yoh phone u na ki bru wa kam toh kiwa naka Online Shopping Website kawa tip kam ka Snapdeal, kiwa da pyntip cha oo wa da jop u yaka Contest wei yow yoh u ya i Prize daw hap su u T. 4,250 kam ka bai Registration wei hadien won T. 56,850 hadien ini da sñiawthooh u wa da chah thok u.
Ha ka 17 tarik won, u Raju Kumar Rai da ujor u wa hadien wa yoo u yaka Advertisement ha OLX wa booh da u Ram Raj Singh yow dai ya kawi ka Scooty (NH-15EN-1502), da kynjoh ktien u wa uni u bru yow thied yaka Scooty, wei da su u leh T. 38,000 lyngba ka Google Pay. Hadien ini da sñiawthooh u wa chah thok u.
Haka 15 tarik, u Kishore Deb Nath da ujor wa em ki bru wa Hack ka ka Facebook Account yong u lok u u Kumar Gupta, heiwa kini ki bru wa Hack da paan yarap ki T. 10,000 deiwa phah ya kani ka poisa cha ka Account. Deiwa ngait wa toh sakhiat u lok uwa ha Facebook, da phah u T. 10,000 lyngba ka PhonePe App. Hadien ini da tip u na uni u lok u wa chah Hack ka Account u.
Haka 14 tarik, u Broming Nongbri da yoh phone u na u bru wa ym tipmit wa kam toh u wakreh waka ‘PhonePe App’ uwa da paan yaka ATM PIN Number, yow ye u pynyabi (Link) yaka Credit Card, heiwa da khana u. Hadien ini hawa pait u yaka Account, da chem u wa da em wa sai T. 20,000 naka Account yong oo khlem da tip u.