Jowai: Ki 11 ngut kiwa chong chnong Huroi deilang wa ka Khasi Students’ Union-Huroi Unit dang pteiñ bait ki wow pyrchah ya i kær sainar chieh (Indo-Bangla Border Fencing) ha Huroi. Kini kiwa chong chnong Huroi kiwa em thaw hapoh ka thaw chnong Lahaleiñ (Lailong) ym pu yoh ki yaka su bai lutsan (Compensation) na i cha ktah i thung i tep na i pynkreh kær sainar wa sarok da ka National Buildings Construction Corporation Limited (NBCC).
Ini i pynsangeh ya i tai i kreh da ki tre thaw deilang waka seiñ man ko ka sien wa le, wei katai ka Company ka thmu bait ko wow pynkreh yabor da i phah u DC.
Ynne ka sngi leh ka 23 tarik, katai ka Company da mut ko wow lai bait cha khmat wow kreh deiwa synran ki pulit Umkiang, tangwa ki tre thaw ym e laad ki. Neiliang ki pulit Umkiang da phah ki ya ki tre thaw wow yachem chem chwa ya u DC, tangwa kitai ki tre chnong da ong ki wa katwon sien u lai mih cha ophis u DC, neibhah neiliang yong u DC da dep klam che u wa wa kitai ki thaw wa da chah pynpra da ka Company toh kiwa da dep su. U DC leh da maham u ya kitai ki tre thaw wa ym toh u pynthut ki ya i kreh, wei lym kamtæ daw phah chipai wow leh ki da iwa eh. Ha itai i por ki tre thaw da ang lyngngoh ki wa cheiwon u DC da su ya katai ka poisa, wei kiyi wa wan chim, neibhah wa ki ym yoh ki wot tang chi anna leh.
Ki tre thaw wa ka seiñ u pteiñ pyrchah ki kat wym pu yoh yaka hok. Ki thung ki tep da chah tympra leh wei da wiar lut, wei ym hun ki du wow dooh ei yaka hok.
Ka kyrwoh na u Poly Pohleng, Vice President KSU Huroi Unit wa ki tre thaw.
Discussion about this post