Resubelpara: Ka Social Mobilization Programme on Horticulture Mission wa pynman ha Resubelpara ynne ka sngi, u Dr. Mukul Sangma da saam u ya ki tre dieñ deiwa kyntu ya ki paidbah khamtam ki warep yow chimkhia ki wow thung ya ki dieñ ki wow yoh myntoi bha ki kamjooh leh wow yada ya ka rymaw kam chibynta wow wailaad ya ka mynried mankawi.
Ya kani ka programme da pynman da ka Horticulture Department hei yakrehlang wa ka DRDA, North Garo Hills, heiwa da emlang u Chairman ka State Planning Board u Salseng C. Marak, ki Parliamentary Secretary kam u Brigady Marak, u Cherak W. Momin wa u Marthon J. Sangma, ki sahep sorkar wa kiwi kiwi.
Hawa klam chaphang ki bynta yong ka Horticulture Mission, kawa tip kam ka Agar & Bamboo Plantations and Mission Organic, u Montri Rangbah da ong u wa boon ki thaw ka jylla wow pynkrehkaam ya ka. Da ong u wa ya kani ka kaam da pynkreh bha deiwa yakrehlang wa ka MGNREGS hapoh ka Mission Green heiwa da esikai ya kiwa rep yow ye ki u kynrong kyntu ya kani ka kaam wow yada ya ki mar rep yong ki.
Da ong u wa nadooh uni u snem wa dadep ka sorkar da pyllait ko chiboon ka poisa yow yarap ya ki chnong wei da saam leh ya chiboon ki tre dieñ kiwa pynmih poisa chiboon bha kam ki murit, ki snikor, ki chken wa kiwi kiwi. Hei yatoh wa i khang wow pam wei wow dai ya ki dieñ agar neibhah wa da jan wiar jait ki, neiliang ka sorkar jylla da pyntip u wa da chna ko ya ka policy heiwa kiwa rep emkaam ki u register pyndaki ya ki hi khnang wow ye ki u yohbor wa kammon u ye ki u pynemkaam ya kini ki dieñ.
Hei yatoh won wa u sarok uwa man u thiedsnaam wow pynsuk ya kiwa rep, u Dr. Mukul da ong u wa u sarok wa 6 km wa pynyabi ya ka Dekachang wa ka Anogre daw chna ya oo hapoh ka Special Plan Fund, katwa da khut tender leh wow chna ya u sarok wa 6 km na Rompara cha Daram.
Ha kani ka yalang da saam u leh ya ki tre dieñ wa boon jait cha kiwa rep.
Kiwi kiwa da klam ha kani ka sngi toh u Salseng C. Marak, u Brigady Marak, u Marthon J. Sangma, u ADC & PD, DRDA, Resubelpara, P.K. Boro wa u District Horticulture Officer, Susannah Sangma.
Discussion about this post