Jowai: I hiar syndet u phria ynne ka sngi heipor kamwa 12:45 nohchariñ ka sngi ha ki kattu kani ki thaw ka West Jaiñtia wa kynthup leh ha Jowai, da yoh khubor wa ha chnong Sohmynting, West Jaiñtia u phria da pynjæd tympra u ya kiwa boon ki yung wei kamwa palat 218 tylli ki tnoom yung da pai thlu ki.
Ha kani ka jooh ka sngi hei janmiet hadien wa ki bor District ka West Jaiñtia Hills da yoh yutip ki yeiwa jia da hiar ki wut wut cha chnong Sohmynting hapoh i yahkhmat u S.C. Laloo ADC wa u Ebormi Langshiang uwa man u District Disaster Management Officer da hiar li e yarap ki ya ki manyung wa chah ktah daki tarpal yow yoh chwa ki paidbah i yada yei yung chipor.
Heijooh i por neiliang u Ebormi Langshiang da ong u wa kam wa man kattæ dang thooh yutip chooh chooh ki neibynta u e yarap ya ki yung wa emkaam u yoh yarap.
Natlor i ktah ya ki yung ki sem da sakhi hadooh ki mrad wa ri kam ki syiar da mynsoo ki wei da em leh kiwa da yap.
U phria leh da ktah u leh ya ki jhoor ki jhep kani ka thaiñ.
Discussion about this post