Jowai: Ka sorkar MDA da pyntip ko wa ha u bnai wa nyngkong wa wan ko ha i synchaar iwi na ki thmu wa ha khmat dooh toh wow pyllait ya ka tulop kiwa sikai SSA kawa da sah nadooh u Khonconglaad (Nov) 2017.
Ka sorkar da ong ko wa da chimkhia ko ya ini heiwa u montri rangbah wa u montri ka puræ puthi da yachem ki wa ki montri ka sorkar pyrdi yow pyllait ya ka poisa wa T. 135 Klur kawa man neibynta ka SSA hapoh ka jylla.
Kamtæ kani ka lai yachem da man ko kawa jop heiwa kiwa sikai SSA u pynbiang ya ka tulop hadooh u Wisu (Mar) 2018.
Ya ka poisa da pyllait ha ka 28 tarik uni u bnai ha ka le bhah ha ka bhah wa nyngkong toh T. 101,16,51,000, ha ka bhah wa ar T. 1,59,99,000 wa le won T. 32,50,00,000 waroh da poi T. 135,26,50,000.
Ha chwa ini ka poisa wa dadep yoh na ka sorkar India da poi ki T. 20053.00 lak wei na ka sorkar jylla T. 24362.149 Lak waroh da poi T. 37888.649 lak.
Katkam ka Sanction Order waroh ka poisa da pyllait hapoh ka General Head (Recurring) wow pynkrehkaam neibynta ka SSA Scheme hapoh ka SC/ST Component neibynta u snem 2017-2018.
Na kani ka poisa T. 13248.10 lak toh ka wow pyllait cha kiwa sikai SSA kawa man kam ka tulop yong ki nadooh Khonchonglaad 2017 hadooh u Wisu (March) 2018.
Discussion about this post