Jowai: Ka seiñ Protection Of Biodiversity & Fishing Association (PBFA) Elaka Raliang ha i emlang ki Waheh Chnong kiwa kitkaam ka Village Defense Party (VDP), u President ka Synjuk Waheh Shnong Ri Jaiñtia Laskein Block Unit u Lowing Laloo, da yoh ki wow theh symbe dakha ha ka 19 tarik uni u bnai ha ki le tylli ki thaw kitæ ha wah Myntang Laskein ha i thaw wa khut Rymphum Poh Jingkieng heiwa da pyllait kamwa 1000 tylli ki symbe dakha kawa man leh ka jooh ka thaw wa pyllait symbe dakha ynnin snem.
Ha wah Myntang Sahsniang ha i thaw wa khut kam ka Thwai Jri da pyllait 3000 tylli ki symbe dakha wa ha wah Mynsar Iooksi ha i thaw wa tip kam ka Thwai Jri da pyllait biang sa 3000 tylli.
Ya kini ki le thaw wa da noh symbe dakha, ka Association da pynbna wow man ki kam ki Fish Sanctuary iwa mut kini ki thaw toh kiwa da yada yaki dakha wei da kyntu ya ki paidbah wow burom ya ki.
Neiliang u Secretary ka PBFA u Lasting Suchiang da kyntu u ya ki paidbah wa chong chnong wow sumaar wei wow chakri neibynta i miat ka rymaw wei da khang leh wow tynyap khiar ya ki doh um hapoh kini ki thaiñ yow ye u pynneh pynsah ya ki iwa man i thmu ka seiñ.
Chooh chooh ka seiñ da kyntu ko ya ki paidbah wym toh leh u thang ya i khloo ki kjam kawa ktah bha ya ki mrad.
Discussion about this post