Jowai : Ynne ka sngi, ar tylli ki seiñbhalang ka Ri-Loom Jaiñtia kiwa kynthup ya ka East Jaiñtia National Council (EJNC) wa ka Jaiñtia Students’ Movement (JSM) hapoh i yahkhmat u Chairman u Sambormi Lyngdoh wa u President ka JSM, D. Kyndait da phah sangeh ki yei kreh ia ka sarok Jowai-Malidor.
Ya katai ka sarok, ka NHAI (National Highway Authority of India) da e ko wow kreh ha ka GR Infrastructure kawa da e Sub-Contract won ha ka Balaji Construction weiwa i kreh da sdang nadooh uni u bnai wada dep nadooh na Tuber Chohchrieh ter ter.
Hei yaklam wa kiwa yahkhmat yong ki ar seiñ da ong ki wa da phah sangeh yei kreh toh neidaw wa ka Balaji Construction ym pu yoh ko ya ki kot wa emkaam kam ka Trading License, ka Temporary Clearance Certificate, wa kiwi kiwi ki kot wa emkaam na ka JHADC wa ka Labour License na ki bor District.
Heijooh i por ki ar seiñ da kynnoh haroh ki wa hadooh katni ympu dep su ya ka bai thaw cha ki paidbah iwa da chim yow chna ya kani ka sarok, wei wa ynne ka sngi da yachem leh ya u ma R. Phawa na ka thain Tuber, uwa man leh uwi na ki tre thaw, da ong u wa ympu yoh u yeiwon yeiwon i su baithaw, iwa da tih ki chibhah ya u loom yong oo ha Kongong.
Hadien kattu katni por wada sangeh i kreh da wan u Manager ka GR Infrastructure yow yaklam pynbait heiwa da pdiang u yei dawa kini ki ar seiñ.
Hei yaklam wa kiwa thoh khubor uni u Manager da ong u wa u sangeh chwa i kreh ha uni u sarok hadooh wa yoh ya ki kot ki sla wa emkaam, wei da ong u leh wa i kreh katni man i du ha ki thaw wa da e da ka PWD cha ka NHAI iwa kmai 11.5 meter weiwa i thaw 1.75 meter mar chilliang na ki bru paidbah kiwa kynthup ya ki dieñ, ki yung wa kiwi kiwi wa da dep sorjamin wei sah sei wow su ya ki baithaw cha ki paidbah.
Chooh chooh da pyntip u wa neiliang ka GR Infrastructure dadep pynbiang lut ko ya ki kot ki sla wa emkaam kaam, kam ka Trading License, wei dadep su ko leh ya ka TCC katwa neiliang ka JHADC won ympu dep ko u e ya ka TTC cha ki, wei ya ka Labour License nei bynta ki 300 ngut kiwa kreh da yoh ya ka license na ka Labour Office wa em ha Guwahati.
Hei yatoh wa ka Balaji Construction won ymtip ware u yei biang ki kot ki sla yong ki, weiwa i kaam wada bhah ya ka Balaji Construction toh du wow tih khyndaw wei wow ah ya ki loom katwa u pyndep won yei chna daw leh da ka RG Infrastructure hi.
Hei yatoh wei bai thaw won da ong u, wa ini waroh da bahkhlieh da ka Office u DC East Jaiñtia Hills wei da kam u leh wa ha West Jaiñtia Hills dadep su ki ya ka baithaw cha ki paidbah.
Neiliang ki arseiñ da ong ki wa ym suki ki katwym pu yoh ki paidbah yei hok yong ki kamjooh leh toh u pynbiang kini ki company ya ki kot ki sla wa emkaam
Discussion about this post