Ka Central Bureau of Investigation (CBI) wa ki pulit ka Kolkata da ya e reiñ ki ynnin ka sngi heiyatoh wa iwa jia chah slaitbor wei chah tynyap kawi ka Doctor ha RG Kar Medical College & Hospital wa em ha Kolkata heiwa ka CBI da ong ko wa ki pulit da pynsih ki yeini i thaw wa jia ya ka Doctor.
Ka CBI hapoh ka Supreme Court da pyntip ko wa kiwa ha-yung kani ka Doctor da chah yahbakla ki heiwa da pyntip cha ki wa pynkut hi ko yei mynsien ko deiwa pyrchang wow murieh yeiwa jia.
Neiliang ki pulit ka Kolkata da kyntait ki yeini wa pynbaad ka CBI wow pynartatien yei rukom kreh ki wei da khana ki wa waroh ki bru wa em hapoh ka kamra toh kiwa da yoh bor katkam i dur wa da poor ha ki rynsan Social Media heiwa da yoo wa em boon ki bru hapoh ka Seminar Hall iwa man i thaw wa jia ini waroh.
Ki pulit da pynche ki wa ki bru wa em heini hapoh kamra toh kiwa embynta hei takit heiwa da kdaw ki leh wa hei dur wa pynpoor ki bru da yoo wa da kær da kah yei thaw wa jia wei ini i dur toh iwa chon ha ka 9 tarik uni u bnai hadien wa dadep wow leh yeiwa emkaam yow pynlang sabut.
U Solicitor General, Tushar Metha uwa yasaaid ya ka CBI da kdaw u leh yei slem wow e FIR, wei kat u poi ha ka sngi wa san waroh iwa em ha ini i thaw da pynthut pynklla ki.
Chooh chooh da ong u wa ya ka FIR da e heipor 11:45 i miet hadien wa dadep wow thang ya ka bru wei da pyntip cha ka bei u pa kawa khlaad wa pynkut hi ko yei mynsien ko.
Ka CBI da pynbaad ko leh ya ki bor pynlai ka Hospital deiwa ong wym em leh ki deiwa biang hadien wa jia ini.
Discussion about this post