Ki pulit ka East Garo Hills da Charge Sheet ki ya uwi u pulit ka CRPF uwa da leh khlemakor ya kawi ka kynthai ha i dukan dai cha wa em hajan Williamnagar ynnin u bnai.
Ya ini da pynbna da ki pulit ka East Garo Hills ynnin ka sngi hadien wa poor iwi i Video ha Facebook wa pynbaad ya ka OC ka Williamnagar Women Police Station wa da pynbor ko ya kawa chah leh khlemakor wow pyndam noh ko ya ka ujor.
U SP ka East Garo Hills da pynche u wa hawa booddien ya ini i kaam da chem wa ka takit toh kawa da pyndep wei da leh ya waroh iwa emkaam da ka Investigation Officer (IO) wei da phah ya ka IO yow Charge Sheet noh khlem da pynslem hakhmat ka yung bichaar ka Williamnagar Session Court.
Da pyntip leh wa ya uni u pulit ka CRPF da beh kreh chipor (Suspended) wa da ieh u yei kaam yong deiwa lai cha ini i thaw dai cha heipor wa dang toh u kreh u namo wa dang em Duty u.
Ini toh iwa da jia hei step ka 02-04-22 heiwa uni u CRPF uwa dang em ya ka Night Duty ha laad Baija yow lai cha Williamnagar, wei da lai u cha ini i dukan cha khlem da pyntip cha ki heh u kamjooh khlem da paan bor wei hapoh ini i dukan da em kawi ka manbei kawa dang pynkhreh cha heiwa uni u pulit ka CRPF da sdang u wow jrong kti ka.
Kani ka manbei da ye ko wow yaleh pyrchah wei da kiad ko wei yeini da sñiaw da ki bru wa em chajan kiwa da wan wow yarap wei da ksoh ki leh ya uni u pulit ka CRPF.
