Ka ABVP Shillong Unit da beiñ ko yei pynbaad da u Vice President ka NEHU Student Union (NEHUSU), u Easterson Sohtun uwa da ong wa da chah dat u ha ki dkhot ka ABVP heipor wa em i lehkmen Holi ha pchem ka NEHU ynne ka sngi.
Ka ABVP da pynche ko wa ynne ka sngi, neiliang ka seiñ World Organisation of Students and Youth (WOSY), da pynman ko yaka yachem lang ha NEHU deiwa emlang leh kiwa lai puræ kiwa na baar ri kiwa da khut sñiawbha ya ki dkhot ka ABVP cha kani ka lehkmen.
Ka WOSY da pynman ko ya kani ka yachemlang kam chibynta wow pyntipmit ya kiwa lai puræ wa kini kiwa na baar ri tangwa heipor wa dang lai bait kani ka yalang, da em ki kattu katni ki dkhot ka NEHUSU kiwa da wan pynthut yei lai bait kani ka yalang heiwa da dat ki leh ya ki kattu katni kiwa lai puræ ha kani ka skurbah.
Neiliang ka ABVP, Shillong Unit da dawa ko wow pynman da ka takit kawa biang wei u e ki leh yei ya krehlang wa ki pulit neibhah kam kini ki kaam damok ymtoh u pdiang hapoh kani ka skurbah wei wow pynman leh yei takit kawa khlem leh chiliang, da ong u Bomsing Khongtir, State Joint Secretary ABVP Meghalaya.
Neiliang won u State Secretary ka AVBP, u Tengku M Marak da ong wa ini i pynbaad u VP ka NEHUSU toh iwa bakla wei i wym yahaap neibhah da wan u ym dei luti wa bha tangwa deiwa thmu wow pynkulmar ha kani ka lehkmen Holi.
U Marak da ong u leh wym em uwon uwon wa jrongkti ya u Easter, wei toh u pynsakhiat u ya kiwon kitæ kiwa dat oo hadooh wa poi cha Hospital.
Chooh chooh u Marak da pynbaad u leh wa em kamwa soo ngut kiwa rah lang wa ki tiar pynmynsoo kiwa sdang wow rah kti ya uwi u khynroo wa lai puræ katwa dang lehkmen wei da pynbaad u leh wa da em ki i thmu nadooh nyngkong wow pynmih yei awri awra ha kani ka lehkmen.
Discussion about this post