Shillong: U Working President ka People’s Democratic Front (PDF) uwa men leh u Montri ha ka sorkar MDA, u Hamletson Dohling da pynbaad u wa i em ka BJP ha ka sorkar Meghalaya Democratic Alliance (MDA) da ktah ko ya ka PDF ha ka Election MDC wa dang dep.
“I emlang ka BJP ha ka sorkar MDA da man ko iwi na ki phang wa kiwa yakhun pyrchah ha ka MDC Election da yoh ki wow pynbaad,” da ong u Hamlet, wei da pynrap u deiwa ong, “Ym ye wow len wa da em i ktah ya ka Party ha ka Election.”
Ye wow pynkynmoo wa ka United Democratic Party (UDP) leh ha kini ki sngi da pynsñiaw ko yei wym kwah u em de ka BJP wow krehlang ha ka sorkar MDA, wei da dawa leh na u Montri Rangbah, u Conrad K Sangma wow pyndam noh ya ki MLA ka BJP na ka sorkar.
Hawa kylli lada ka PDF leh daw booh ko ya ini i dawa, neiliang u Dohling da ong u wa ka Party ym ye ko wa dawa ya ini tangwa chong ha ka rai yong u Montri Rangbah.
“Ym dawa i wow pyndam noh ya ka BJP na ka sorkar MDA, tangwa daw rah i yei sñiaw yong i ya i eh wa chem i hakhmat u Conrad Sangma wei chong ha i bor u Montri Rangbah wow pyndam næ wow pynneh ya ka BJP ha ka sorkar MDA,” ong u Hamlet Dohling.
Discussion about this post