Shillong: U symbood montri rangbah ka Meghalaya, u Prestone Tynsong da pyntip u wa u khoo neibynta wow dai ha ki yaw da poi katni ha Guwahati kamwa 1000 metric ton na ka 11,727 metric ton wa da ya pynbiat wa ka Food Corporation of India yow pynbiang ya u khoo cha ka jylla.
U Prestone da ong u wa ki paidbah ym emkaam ki wow khuslai hawa yatoh waki marbaam, neiliang ka sorkar da pynbiang ko kamwa jooh man. Da pyntip u wa neiliang ka chnat Food and Civil Supplies da pynbiang ko leh ya u khoo lyngba ka National Food Security Act neibynta u April, May, June.
Ha i jooh i por u montri da pyntip u wa heiyatoh wa ki jhoor, neiliang ka chnat i rep i riang da booh ko ya ka I-team kawa da pynkhreh ya ki Agriculture Response Vehicle 11 tylli ha East Khasi Hills, kiwa lai thied ya ki jhoor na ki warep yow pynpoi won cha waroh ki dukan dai marbaam kiwa em ha ki thaw waphær waphær ha i dor wa jooh man.
Da ong u leh wa kam ini i pynkhreh da leh ha kiwi ki District leh khnang wa ki paidbah u suk wa ki kamjooh ki warep leh u yoh myntoi ki. Chooh chooh da pyntip u wa da booh ya u Number 1917 wa ki warep ye ki wow pyntip wa em ya ki jhoor wow dai wa ka I-team wow lai thied ya ki.
Hawa yatoh wa kiwi ki marbaam kam i doh, i dood, ki soh wa kiwi kiwi, u Prestone da pyntip u wa kini leh kynthup kam ki marbaam wa emkaam wei ki dukan ye ki wow wai ha i por wa da yohbor ki na ki Deputy Commissioner.
Discussion about this post