Kam chibynta wow kdoh u khoom yei poor ka khlam COVID-19, ka Joint Committee on Village Covid-19 Management, Mynso-A wa Mynso-B, da booh ki kattu katni ki kyndon, kiwa man kamni ha wah:
Da khang chwa chipor yaka yaw Pyngkat hadooh wa pyntip da kamwi won.
Hawa em i yap bru, da kyrpaad ya kiwa ha yung wow sñiawbha wa ym toh u pynchong sngi, wei wow tlep/thang yei met haka sngi wa bood.
Ym chah ya kiwa na baar chnong wow wan lai tlep hawa em wa yap, lait du ya kitu kiwa emyatoh kawa jan bha wa u/ka wa yap.
Da khang leh ya ki paaid chong chnong waroh wa ym toh wow lai tlep bru ki cha kiwi ki chnong, lait nawa em wa yap kiwa yajan bha. Lada em kam ini, toh u pyntip chwa cha kiwa yahkhmat chnong chwa wow lai.
Hawa em wa yap bru, ym chah wow chong slem ha yung yap bru, khnang yow ye u bood ya ki kyndon wa da booh da ka sorkar, katwa kiwa em ha yung wa yap bru ym toh u palat ki ya 20 ngut nalor ki tre yung.
Waroh kiwa wan ha yung yap bru, u thoh yei pyrtuid wa i Mobile Number yong ki haka Register wa da pynkhreh da ka Committee.
Neibynta ki dukan:
Waroh ki tre dukan toh u pyntikna ki wa ym chah ya kiwa wan thied wow psiah ki hapoh dukan ha i jooh i por palat ya 2 ngut.
Ki tre dukan ym toh u chah lane u dai tiar cha ki khynnah, lane kiwa wan thied kiwa psiah khlem deiñ Mask.
Ki tre dukan toh u booh ki ha lait dukan ya i Hand Sanitizer lane yaka um yow sait kti deilang wa i sabon khnang wa kiwa wan thied u sait kti chwa ki chwa wow psiah chapoh dukan.
Ki tre dukan toh u booh ki ya kawi ka Register wa u khulom khnang wa waroh kiwa psiah chapoh dukan khamtam ya kiwa na baar chnong, yow yoh ki wow thoh ya i pyrtuid wa Mobile Number yong ki.
Lada ki dukan tyngkheiñ ki ya kini ki kyndon, daw cha khang ki chi syndon.
Da khang leh wow pynman ya kiwon kiwon ki khawai lane ki kynja tamasa wa ka yalang paidbah.
Neibynta ki kari kamai:
Kiwa yah kari ym toh wow kit bru ki palat ya iwa da booh da ka sorkar.
Kiwa yah kari kamai toh u syndong bha ki hawa kit ya ki bru ki wym tipmit, khamtam ya kitu ki wym toh kiwa naka thaaiñ yong i.
Da khang leh ya kiwa lai khwe wa na baar chnong wa wan khwe ha ki wah wa haap hapoh u pood ka chnong Mynso.
Ka Committee da kyrpaad ko ya waroh wow sñiawbha ki u ya krehlang khnang wa i yakhun pyrchah ya kani ka khlam yow poi chei jop.
Ka kyrwoh na u Arnesson Syntem, Secretary Joint Committee on Village Covid-19 Management, Mynso wa na u Elington Sungoh, Chairman Joint Committee on Village Covid-19 Management, Mynso.
