Hadien 17 sngi wa ym em de wa yoh COVID-19 ha ri New Zealand wei da chait leh uwa khaddooh wa yoh COVID-19, ka Prime Minister ka New Zealand ka Jacinda Ardern da sñiawskem ko waka New Zealand da ye ko wow pyndooh yei poor u khñiang COVID-19 hapoh ka ri.
Ha New Zealand da em 1,504 ngut kiwa yoh COVID-19 wei kiwa yap da em ki 22 ngut.
Uwa yoh nyngkong dooh hapoh ka ri ya u COVID-19 toh haka 28-02-20 wei nadooh ka 23-05-20 hadooh ynne ym em da wa yoh COVID-19 wei ha kini ki sngi da dep Test sa 40,000 ngut ki bru iwa waroh da poi 300,000 ngut.
Ka New Zealand kawa em kamwa 5 Million ngut kiwa chong chnong da wai biang ko leh yaki madan yalehke hadooh ki lympung ya tem ya put hadooh wa da yoh u chong lieñsuiñ kamwa jooh khlem da booh kyndon.
Hanla kattæ leh ka Prime Minister da ong ko wa ym dam u em biang kiwa yoh COVID-19 kiwa wanrah ya oo da kiwa psiah chapoh ka ri deiwa ong leh wa dang khang ya kiwa na baar ri wow psiah chapoh ka ri lait noh ki tre ri wei waroh kiwa liwan hap ki wow leh Quarantine.
Da ong leh wa da pyndam yaki kyndon hawa pynman yalang paidbah, ki bia kamjooh i lai tlepbru.
Chooh chooh da ong ko wa ini i jop ka ri da wan i hei chah ktah ki hajar ngut hapoh ka ri kiwa da dooh yei kreh yong ki khamtam kiwa em haka kaam uiñke suwari kawa da yarap 10% cha ka muna poisa ka ri.
