Ka sorkar jylla ha ka yalang yong ka dhab ki Montri namo ka Cabinet ynne ka sngi, da mynjur ya le tylli ki Policy wa kynthup ya ka Tourism Policy 2023, ka State Organic and Natural Farming Policy 2023 wa ka Meghalaya Advertisement Policy 2023.
U Montri Rangbah ka jylla, u Conrad Kongal Sangma da khana u leh wa najrong kitai ki Policy, ka Cabinet da mynjur ko leh wow wanrah ya ka Drug Reduction and Elimination and Action Mission (DREAM), wei kani ka Mission toh wow booh thong neibynta wow pynman ya ka jylla kawa lait nei pynemkaam Drug.
Hawa yatoh wa ka Toursim Policy, u Montri Rangbah da ong u wa kani ka Policy daw pynku ko ya ki kaam uiñke suwari kawa da dep chna nyngkong ha u snem 2011, wei hadien yong utai u snem da mih chiboon ki kylla ha ki kaam uiñke suwari, iwa da pynman ya ka sorkar wow chimkhia wow wanrah ya ka Policy kawa yahaap wa kani ka por kawa katni.
Da ong u wa kani ka Policy wa ka sorkar da wanrah ko da pait ko yow pynneh pynsah ya ki thaw uiñke suwari, wow wanrah ya ki laad yoh kreh neibynta kiwa chong chnong wei kamjooh hei wow seiñ kaam seiñ jaam, i pynemkaam ya ki kor wa katkam kani ka juk deiwa ya krehlang leh wa ki chnat krehkaam yong ka sorkar.
