Ka ri Thailand kawa man ka ri wa ka-it bha wa kiwa lai uiñke suwari heiwa ha u snem 2019 da em palat 39 million ngut ki bru wa lai ke cha kani ka ri wa em ha South East Asia, ynne ka sngi Bibar da pynbna kawa e ktien ka sorkar Thailand ka Panprapa Yongtrakul wa ym em wa yoh thymme ya u COVID-19 hapoh ka ri.
Ini da man i i sien wa soo wa ha uni u bnai ym em wa yoh ya u COVID-19 ha Thailand wei ha uni u bnai leh du chisien wa em palat 10 ngut kiwa yoh ya u COVID-19 haka chi sngi itæ haka 4 tarik uni u bnai wa em 18 ngut kiwa yoh.
Waroh kiwa da yoh ya u COVID-19 ha Thailand da em ki 3,040 ngut heiwa na kini da chait 2,921 ngut wei kiwa dang em hapoh Hospital da em ki 63 ngut wei kiwa yap 56 ngut.
Ha Thailand uwa yoh nyngkong ya u COVID-19 da chem haka 22-01-20.
Na ki ri wa em ha South East Asia kiwa boon toh kiwa da ye bha u kdoh u khoom yei poor u COVID-19 kam ka ri Cambodia heiwa ha uni u bnai hadooh ynne ka sngi da em du 2 ngut kiwa dang yoh thymme heiwa waroh kiwa da chah ktah da em ki 124 ngut wei na kini da chait 122 ngut wei kiwa dang em (Active) da em ki 2 ngut.
Ka Vietnam leh da em ko du 325 ngut kiwa chah ktah ha u COVID-19 heiwa na kini 267 ngut da chait ki wei ha uni u bnai 17 sngi ym em wa yoh COVID-19.
Ka ri Malaysia leh man ko kawa da ye u pynduna yei poor u COVID-19 heiwa ha uni u bnai kiwa dang yoh thymme ya u COVID-19 da em ki ha kiwa boon ki sngi hapoh 100 ngut chi sngi. Waroh kiwa da chah ktah ha kani ka ri da em ki 7,185 ngut heiwa da chait 5,912 ngut wei kiwa yap da em ki 115 ngut.
Kiwi de ki ri wa duna bha kiwa chah ktah toh ka Myanmar 201 ngut, Laos 19 ngut, Brunei 141 ngut wa Timor-Leste 24 ngut.
Ki ri ha South East Asia won kiwa da tam 10,000 ngut kiwa chah ktah toh ka Indonesia, Singapore wa Philippines.
Ha Singapore kiwa chah ktah da em ki 31,068 ngut wei da chait 13,882 ngut.
Ha Indonesia kiwa chah ktah da em ki 21,745 ngut wei kiwa da chait da em ki 5,249 ngut.
Ha Philippines kiwa chah ktah da em ki 13,777 ngut heiwa kiwa chait da em ki 3,177 ngut.
Discussion about this post