Ka Dorbar ki Soo Langdoh ha Madan Lariang Ialong toh kawi na ki Dorbar wa da pynman katkam ka dustur sikai niam hadien wa dadep i ah ya u kba u khoo na pynthor na bhiang wei ha uni u snem da pynman ya ka ha ka sngi Pyngkat 14 tarik December heiwa najrong ki Chakri Ñiam yong ki Soo Raij-Soo Langdoh da sakhilang leh da ki yahkhmat yong ki Soo Seinraij wa kynthup ya ka Seiñraij Jowai, Seiñraij Tuber, Seiñraij Chyrmang wa ka Seiñraij Ialong.
U Pator ka Elaka Jowai, u waheh Raymond Nartiang kam u Chongknor yong kani ka Dorbar da e u ki kyntien yahkhmat wa ki kyntien pdiang burom neitæ won pynbood i klam i khana ki Soo Langdoh ya ki sngi ki tayaaw yong ka Chaad Ñiam Behdieñkhlam 2026.
Katkam i e wyrta chula yong ki Soo Langdoh hakhmat ka Dorbar, ha Raij Chyrmang ka sngi pynkut ya ka Chaad Ñiam Behdeiñkhlam u man ko ha ka 26 tarik April, ha Raij Jowai u man ko ha ka 9 tarik u July, ha Raij Tuber u man ko ha ka 17 tarik u July katwa ha Raij Ialong won ka sngi pynkut ya ka Chaad Ñiam Behdieñkhlam u man ko ha ka 10 tarik u August 2026.
Chooh chooh ha ka thong wow wanrah yei sñiaw yaman iwi wei sñiaw yajooh yajan hapyrdi ki khon yong ki Soo Raij-Soo Langdoh, ha kani ka Dorbar da yoh leh yei klam e mynsien wei kyrsu kyntu, i sneiñ i kroo na ki yahkhmat yong ki Soo Raij wa kynthup yow O.H. Toi, President Seiñraij Jowai, u Pyrkhat Shylla, President Seiñraij Ialong, u Helping Phawa, President Seiñraij Tuber, u Bichar Talang, Tymmen Raij Talang, Seiñraij Kongwasan Chyrmang wa kamjooh leh i klam na u Puramon Kynjing, Dolloi Elaka Jowai wa man kam u khlieh ka niam khlieh ka Elaka.
Iwa kyrpang chooh ha kani ka Dorbar ki Soo Langdoh toh i pynskem ya kiwa kitkaam ka Dorbar Ñiam ki Soo Langdoh kiwa kynthup yow Raymon Nartiang, Pator Elaka Jowai (Chairman), u Hoping Bang, Kongwasan Raij Chyrmang (Secretary), u Samboon Siangbood, Langdoh Raij Jowai (Vice-Chairman), u Starly Lyngdoh, Langdoh Raij Ialong (Treasurer), u Arwotki Sumer, General Secretary Seiñraij Jowai (Convener Auditorial Board), u Abul Phawa, Vice-President Seiñraij Tuber, u Pyrkhat Shylla, President Seiñraij Ialong wa u Kerlang Lakiang, General Secretary Seiñraij Chyrmang kam ki dkhot yong ka Auditorial Board katwa ki dkhot yong ka chongpyrkhat kaam ka Dorbar Ñiam kynthup ya waroh ki Wasan, ki Kñi yong ki Phra Kur Phra Kmai Raij Jowai, ki Tymmen Raij/Tymmen Papiah/Waheh Kur na ki Soo Langdoh/ki President Secretary yong u Kongwasan Seiñraij Chyrmang, Seiñraij Jowai, Seiñraij Tuber, Seiñraij Ialong, Seiñraj Ummulong wa ka Seiñraij Shillong.
Katkam ka yurim sikai niam ha kani ka Dorbar hei yahkhmat u Pa Dolloi chirrup ki Soo Langdoh wa ki wasan waheh da pyndep leh yei suit i choor wei ngoohblai ngoohsyiem neibynta wow biang u toh u tne ki kaam niam, kaam Raij kaam chnong ha ki por ki sngi kiwa chakhmat.
Khaddooh chwa wow poi chawakut yong kani ka Dorbar da yoh leh i chaad sur tre wa da chimbynta da ki khon ka Seiñraij Chyrmang, Seiñraij Jowai, Seiñraij Ialong wa na Seiñraij Iongnoh.
Discussion about this post