U Montri Rangbah ka sorkar jylla, u Conrad Sangma hawa wan pynhaap pyrda yei lehkmen dap 25 snem ka Thomas Jones Synod College Jowai, ynne ka sngi da pynbna haroh u wa wym slem de daw tipmit noh ya kani ka College hapoh ka People’s College Scheme neibhah katkam i chakri yong ka wow e i tip i stat da chong hok hi yaka wow yoh ko yeini.
Han lym pu pyntikna yei por neibhah wa dang lai chakhmat yow pait ya kiwi leh, tangwa da tikna wa haka kynti wa ar u jied ya ka Thomas Jones Synod College wei ym dam de ko u em haka thup yong ka People’s College Scheme, kawa oo hi deilang u Montri ka chnat puræ puthi da dep ki wow mynjur, da khana u Conrad Sangma.
Hawa kyruiñ won u cha u moomær dap 25 snem kani ka College da e khublei u ya waroh kiwa embynta u pynman ya kani ka College kamwa man ko katni.
Yooluti u leh wow nang ku chooh chooh ko ha ki 25 snem wow wan, wei u man ko leh ka nongmuna ya kiwi won ki thaw puræ heiyatoh wei stat i tip, khamtam u pynmih ya ki bru wa em i kitkhlieh neibynta ka jylla wa ka ri.
Kamwa ki khynroo toh ka bor yong ka mynried, kyntu u ya kiwa pynlai kani ka College wa najrong i sikai lyngba ki kot, toh u sñiawthooh haroh ki kammon u sikai pynwandur yei thij i pyrkhat kiwa puræ ha kani ka College khnang yow man ki kiwa chong chnong wa chemphang hei bynta waphær waphær.
Neiliang ka sorkar leh khana u wada pyrchang wanrah ko yaki Policy waphær waphær heiyatoh wa ki khynroo, najrong wa ka sorkar da yarap pynchlur ko yaki khon khynroo lyngba ki sap wa ki em ki.
U Lahkmen Rymbui, Montri ka chnat puræ puthi ong u wa ka puræ puthi wymtoh ka kam wa suk, ka sorkar wa katni da pyrchang ko u pynku yei stat i tip haka jylla lyngba kiwa sikai wada dep pynpliah, u chna yaki yung skur, u pynman yaki skur kiwa lai bait lai ryntih wa kiwi de.
“Hawa wanrah ya kawon kawon ka phang ym ye u pynhun lut ya waroh daw em bait kiwa boh, tangwa hap i wow lai chakhmat yeiwa toh,” da ong u Lahkmen.
Hawa khruiñ won u chei yakhih kiwa sikai ini wa dep, ong u da mih boon i pynbaad ya ka sorkar hei rukom waphær, tangwa ym em uwi leh wa klam heiyatoh i thungkreh pura ka sorkar ya palat 1500 ngut kiwa sikai deiwa ap ki yei ood i naam ki paidbah wei da leh yeiwa emkaam.
U Lahkmen da yaroh u leh ya ka Thomas Jones Synod College wa toh kawa ye u jop hawa pynkrehkaam ya kawon kawon ka Scheme wa yoh naka DONER wa naka RUSA.
Heiyatoh waka B.Ed College ha Jowai, khana u wa haki soo snem da booddien u ka tangwa neidaw wa mih ki kyndon thymme neipor cheipor tæ dang sahteiñ ko, wei ynne i step leh dang yaklam u wa u Secretary ka NCTE uwa da pyntip wa i kaam dang lai ko chakhmat.
Kiwi won wa e i klam kynthup ya u Wailadmiki Shylla MLA, Jowai, u Dr. D.G. Lyngdoh Principal TJSC, u Rev. G.S. Lytan, Moderator KJP Synod Mihngi Cum Chairman, Governing Body TJSC wa kiwi haka yalang wa pynlai da u W.E.H. Lamin Convener Silver Jubilee Celebration, chirup i emlang u CEM ka JHADC, u Thombor Shiwat, u SP ka WJH u B.D.Marak, u P.K. Boro ADC, WJH, ki pastor, kiwa yahkhmat yaki niam waphær, kiwa sikai wa kiwa chah khut sñiawbha.
Ha kani ka sngi u Montri Rangbah da wai haroh u ya ka Science Block Building kawa da pynkreh lyngba i yoh yarap poisa naka RUSA.
