Tura: U Montri Rangbah ka jylla u Dr. Mukul Sangma da pynbna u wa daw e T. 1 lak ya waroh ki Village Employment Council (VEC) kiwa da ye u pyndep ya 80% ki sngi kreh ha waroh ki kaam wa kreh hapoh ka MGNREGA wei da kyntu u leh ya waroh ki VEC wow lai ki chaphrang dei rai wow pyndep bha ya waroh i kreh wa da sdang ki yow yoh myntoi ka juk wa daw wan manda yarap biang ka sorkar lyngba ki tnat yong ka.
Ya ini u Dr. Mukul da ong u ha ka nyngkong dooh ka yalang ki VEC kawa tip leh kam ka “VECs’ Conference on Innovation and Convergence” kawa toh du ya ka ri-loom Garo kawa pynman ynne ka sngi ha Dikki-Bandi Stadium, Tura heiwa de emlang leh u Commissioner & Secretary C&RD, P. Sampath Kumar, ki Deputy Commissioners ka West wa South West Garo Hills, u Pravin Bakshi wa u C.V.D Diengdoh, ki waheh chnong, ki DRDA Project Directors ka ri-loom Garo wa palat 3000 ngut ki dkhot ka VEC na 5 tylli ki District ka Garo Hills.
U Dr. Mukul leh da sñiawngooh u ya ki kaam wa bha wa da leh ki VEC yow pynkrehkaam ya ka MGNREGS, wei kani ka sngi toh ka laad ya ki wow yachem lang ki yow yaklam ya kiwa da dep leh kamjooh leh iyi wa emkaam wow lai cha khmat yow wanrah yei kylla hapoh ha imlang sahlang khamtam ha ka yoh ka kot.
U Dr. Mukul leh da ong u wa emkaam leh wow pyllait ya ka nongsngi heipor wa biang wei lada slem ka poisa wa wan na ka sorkar pyrdi, ka sorkar jylla em hi ko ka poisa wow su chwa naka.
Ha kani ka sngi leh da pyllait u leh ya ka Livestock Mission Document wei da ong u leh wa lyngba kani hapoh 5 snem 40% kiwa sah cha nongkyndong daw e ya ki ya ki sniang yow ri ki ka wow yarap wow pynbiang yei emkaam doh ka jylla.
Da pynkup burom leh ya ki VEC kiwa da leh bha wei kiwa stat u pynkrehkaam ya ka MGNREGA kamjooh leh ya kiwa dai Wholesale wa ki Fair Price Shop kiwa pynkrehkaam bha ya ka National Food Security Act.
Da pyllait leh ya i rwai (Theme Song) ka MGNREGA iwa da rwai leh da kiwa rwai wa wan na Shillong ha kani ka sngi.
Discussion about this post