Ka sorkar Manipur da pynbna ko wow e yarap da ka song poisa neibynta ki bru yalehke (Sportspersons) ka jylla kiwa yoh takma ha ka Tokyo Olympics Games kawa daw pynman nadooh ka 23-07-21 hadooh ka 08-08-21.
U Montri Rangbah ka jylla u Nongthombam Biren Singh da pynbna u ya ini hawa wai ya ki Selfie Point yow pynyoo yei kyrchaan ya kiwa yalehka ka India cha ka Olympic heiwa ya kini ki Selfie Poing da booh ha yung sah u Montri Rangbah, katkam wa pyntip ka Secretariat u Montri Rangbah.
U Biren Singh da pyntip u wa ka sorkar jylla daw ekti ko da ka song poisa wa T. 1.2 klur cha kiwa yoh takma ksiar, T. 1 klur cha kiwa yoh takma rupa wa T. 75 lak cha kiwa yoh takma tama cha kiwa lai chimbynta ha ka Tokyo Olympics kiwa napoh ka jylla.
Da khana u leh wa ka sorkar u e ko leh ya ka poisa wa T. 25 lak cha ki 5 ngut kiwa napoh ka jylla kiwa mihkhmat ya ka ri ha ka Tokyo Olympics. Deiwa pynsñiaw yei sñiawskem wa kiwa yalehke ka jylla wa daw yoh takma ki neibynta ka ri, da pyn-eh daw u ya waroh ki 5 ngut kiwa yalehke ka jylla neibynta ki paaid ka Manipur.
Ki san ngut kiwa daw lai chimbynta na Manipur toh ka MC Mary Kom Boxing (Women’s Boxing 51kg), ka Sushila Chanu Pukhrambam (Women’s Hockey), u Shanglakpam Nilakanta (Men’s Hockey), ka Saikhom Mirabai Chanu (Women’s 49kg Weightlifting) wa ka Likmabam Shushlia Devi (Women’s Judo 48 kg).
