Ka satri ki seiñbhalang hapoh i pyrtuid ka Jaiñtia Coordination Committee for Reservation Policy (JCCRP) wa kynthup ya ka seiñ JSU, JYF, JSM, EJNC, ka Synjuk Waheh Chnong Ri Jaiñtia waka Synjuk Waheh Chnong Jowai ynne ka sngi da pynman yalang ki heiyatoh ka Reservation Policy waka Roster System.
Hadien kani ka yalang neiliang u Jersom Shylla uwa man u Chairman ka JCCRP da ong u wa hadien wa ka sorkar ym pdiang ko wow sylli (Review) ya ka Reservation Policy wa i pynkrehkaam ya ka Roster System nadooh uni u snem wei ymtoh nadooh u 1972, kamtæ ini daw ktah bha ko ya ki Khasi wa Jaiñtia ha ki por wa daw wan.
Da ong u wa lada ka Nagaland da rai ko wow pynthymme ya ka Reservation Policy neiyi i daw ha jylla Meghalaya ymye ko wow pdiang ya ini.
Da pyntip u leh wa hadien ka yalang ynne da chim ya ka rai wow pynman da ka Sit In Demonstration ha Jowai ha ka 29 tarik, ha Khliehriat ha ka 31 tarik uni u bnai wa ha Amlarem ha ka 2 tarik u Naiynru nadooh 10:00 waje i step hadooh 5:00 waje i janmiet wei lada ka sorkar ym ye ko u jubab daw pynkhor chooh ya i yakhih.
Heijooh i por da kyntu u ya kiwa chong chnong wow yatylli wa ka Committee khnang wow man ka kaam kawa jop.
Neiliang u Sambormi Lyngdoh, Secretary JCCRP da ong u wa ka yurim wa dawa yeini toh wa ya ka jylla da bhah ha ki le tylli ki District Council wei katkam ka Reservation Policy wa da chna ha ka 12-01-1972 da klam che wa ya ka bhah haprydi ki Khasi, Jaiñtia wa ki Garo toh katkam i boon paaid wei boi ha kitu ki snem i rukom boon paaid man i katjooh tangwa hadien sanphaw snem i boon paaid ha KHADC da ryngkat i wa ka GHADC wei da mylliñ ya ka JHADC kamtæ ka sorkar toh u sylli ko ya ka Reservation Policy.
Da pynrap u wa kani Roster System wa ka Reservation Policy wailaad ko ya ki Garo na kiwi ki jylla lada ymye kiwa na Meghalaya wow pynrap yei yoh bhah kreh wei ya ki Khasi-Jaiñtia da man ka bhah kawa noh chiliang cha ki Garo.
