U Director ka chnat Social Welfare, Meghalaya da pynche u heiyatoh wa mih khubor wa yoh kem ki pulit Assam ya u khoo na kawi ka Godown ha Assam heiwa da pynbaad wa uni u khoo toh uwa da bhah cha ka Continental Milkcose Ltd. da ka FCI Shillong lyngba ka Social Welfare Department.
Heiyatoh wa ini da pynche wa ka sorkar India da booh bhah ko ya u khoo hapoh ka Wheat Based Nutrition Programme (WBNP) cha ki jar jiar ki jylla. Kamtæ ka Directorate of Social Welfare da e won ko yei bhah cha kiwa da tipmit (Approved Manufacturer) ka Continental Milkcose Ltd kawa da kit ya uni u khoo na FCI Lockdown.
Kani ka Company won na uni u khoo pynmih ko ya kiwa boon ki jaitbaam ki wow tei yei doh i pran kiwa da pynpoi cha ki Anganwadi Centre hapoh ka Nutrition Programme.
Da ong leh wa ym em i jia wa ym em pynpoi ya ki marbaam hadooh katni wei da poi katkam wa toh i bhah wow poi.
Chooh chooh da pyntip wa ka Directorate of Social Welfare da phah ko ya i nongmuna (Sample) yong kini ki marbaam wow phah Test ya ki wei da chem wa i baam wa da e ym jooh em toh iwa sih namo ym toh katkam ka kyrdan wa da booh.
Da pynkut deiwa ong wa dang yang ya ka chithi na u pulit ka Assam wa pynman ya kani ka takit yow ye u pynchitom ya kiwa chalan namo ki Supplier.