theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1
Advertisement ad1

Pynche ka DoT yei sñiawthooh bakla wa ki Mobile Tower ktah ki yei chait i khiah

Advertisement ad1

Ka Department of Telecommunication (DoT), Northeast License Service Area (LSA) ha ka 30 tarik u Wisu da pynman ko ya ka Seminar yow pynsñiawthooh hajrong ka “Electromagnetic Radiations from Mobile Tower” ha Shillong yow pyndooh yei sñiawthooh bakla chaphang i ktah ki Mobile Tower yow ye u pyndap yei emkaam wow booh ya ki Mobile Tower ha ka thaaiñ North East neibhah em boon ki sñiawthooh bakla wa ktah ki Electro Magnetic Field (EMF) wa mih na ki Mobile Tower yei chait i khiah ki bru.

U A.K. Jain, DDG (Compliance) da ong u wa ki Mobile Tower toh kiwa emkaam bha ha ka khayi pateiñ kawa katni wei emkaam wow em ki Mobile Tower ha kiwa boon ki thaw yow ye u pynbiang ya ka Network wei kini ki Mobile Tower Radiation ym em ktah ki yei chait i khiah. Deiwa ong leh wa ka aiñ khang ko wow pynemkaam da ki SIM Card wa ki Mobile Network yong kiwi ki ri.

Neiliang u Ravi Goel, Sr. DDG DoT, Northeast LSA, Shillong da ong u wa ka WHO wa hadien wa puræ bniah ko ya ki 25,000 tylli ki Article wa da pynmih ha kylleiñ ka pyrthai, da chem wa ki Mobile Tower ym em ktah ki yei chait i khiah.

U K. Sri Krishna, DDG Mizoram da ong u wa ka sorkar India da booh ko ki kyndon wa khor bha hadooh katwon i bor wa ye u pynmih da ki Mobile Tower wei ki kyndon toh kiwa khor 10 chah ya iwa da booh da ka ICNIRP wa da ka WHO. Da pyntip u leh wa ka DoT man-i-por da lai booddien ko ya i bor ki EMF wa mih na kini ki Mobile Tower ha kylleiñ ka India yow pyntikna wa bood ki ya ki kyndon wa da booh heiwa ka Radiation wa mih man ki hapoh iwa hoi u pynmih i wym ktah ya kiwon kiwon.

Ka chnat lyngba ka LSA leh lai ki da ki bru wow sylli ya kini ki Mobile Tower wei da chim yukheiñ leh hadooh katwon khlanbor ka EMF ha ki thaw wa em ki Mobile Tower kamtæ da ong u wa emkaam wow pyndooh ya ini i sñiawthooh bakla wa chah ktah i chait i khiah na ki Electromagnetic Field Radiation (EMR) na ki Mobile Base Transceiver Station (BTS) Antenna wa na ki Mobile Phone leh kamjooh.

U. Dr. Arun Chougule, Senior Professor & Head Department of Radiological Physics SMS Medical College & Hospitals, Jaipur uwa da chimbynta lyngba ka Internet ha kani ka Seminar da ong u, “Ka EMF Radiation wa mih na ki Mobile Tower Antenna wa ki Mobile Handset toh kiwa tip kam ki Low Non-Ionizing RF/Electromagnetic Energy. Wei ka thooh bniah (Scientific Research) yei ktah ki yei chait i khiah na ki Radiation wa mih na ki Mobile Tower da chem wa kini ki Radiation wa tlot bor namo ki Low Powered, Non-Ionizing Radiation wa mih na ki Mobile Tower ym em ktah i heiwon heiwon i rukom yei chait i khiah. Kamtæ da emkaam bha wow yaklam ya ini yow lait nei sñiawthooh bakla ki paidbah neibhah ym em sabut wa pynyoo wa ktah ki Mobile Tower yei chait i khiah.’’

Neiliang u Ravi Goel da ong u leh wa ka India emkaam ko chiboon ki Mobile Tower yow poi cha ka thong Digital India wei katkam wa da antaad wa ki 5G Connection daw em ki 1 Billion tylli ha u 2022 wa 2 Billion tylli manda poi u 2025. Wei chwa u kut ka 2027 ki 5G daw pynemkaam da 39% kiwa pynemkaam Mobile ha India.

Da ong u leh wa ini i sñiawthooh bakla da ki kattu katni ki bru toh u pynche da ki sabut wa biang wei deiwa lai pait bniah yei krehkaam ki Mobile Tower dei langær yow pyntikna wym em kiwa tyngkheiñ yei kyndon hadooh wa ki yung bichaar ka ri namo ki High Court kiwa da em 8 tylli leh da pynmih hukum ki ha ki mutkoduma kiwa da yaleh pyrchah yei booh Mobile Tower wa ktah yei chait i khiah tangwa da chah pynrem ki. 

Ka NE LSA da pyntip ko wa da dep ko wow lai Test ya 2400 tylli ki BTS namo ki Mobile Tower nadooh u April 2021 hadooh u March 2022 wei da chem wa waroh toh kiwa krehkaam katkam ki kyndon ka DoT heiyatoh wa ka EMF Radiation.

Ya kini waroh ye wow yoh naka DoT website https://dot.gov.in/journey-emf, wei lada em kiwa chong chnong kiwa kwah wow phah Test ya kawon kawon ka Mobile Tower wa em chajan yong ki ye ki wow leh deiwa lai ha http://tarangsanchar.gov.in/EMFportal.

Share this:
Previous

I sñiawngooh na ka Dorbar Chnong Dulong

Next

Da rah tarik ya ka Chaad Sukra ka Seiñraij Muthlong