Ka NPP Hingaria lyngba u President, u Ren Surong da pynche u wa ha Hingaria ym joo em Unit ka NPP ha ki por wa da dep kat wym pu em mih ka Santa Mary Shylla wow yakhun ya ka Election MLA tæ da chna wei da wan ya kshokti lang ki khynroo khyllood wa ki manbei manpa wow kyrchaan pura ya ka Santa kawa da man leh ka manbei wa nyngkong dooh wow mih chakhmat wow e reiñ yow mihkhmat cha ka dorbar chna aiñ ka jylla napoh ka 5-Sutnga Saipung Constituency.
Wei da kyrchaan ya ka deiwa kyrmen u poi cha ka thong yow yoh yei kylla ha ka roi ka paar haka imlang sahlang wa em ha ka thaaiñ khappood wa ka Bangladesh. Neibhah da ki phaw snem da sah sa du ki kular chwa ka Election tangwa manda kut da kut hi wot.
Kamtæ ini i kam wa kiwa bood ya ka NPP da lai kynthih ki cha ka UDP toh iwa bakla wei du wow pyndooh mynsien ya kiwi won kiwa em mynsien wow e kyrchaan ya ka Santa Mary Shylla wei wow myntoi u Shitlang Pale, kyrtong UDP da pynkut ka kyrwoh na u President ka NPP Hingaria.
Kam wow pynkynmoo wa ka UDP da kam ko wa da ki phaw ngut kiwa kreh ka Congress, NPP wa BJP da psiah ki cha ka UDP wow kyrchaan pura ya u kyrtong ka UDP, u Shitlang Pale na Sutnga Saipung Constituency. Wei da kam leh wa da chna ya ka UDP Hingaria Unit ha ka 7 tarik uni u bnai.
