Hadien wa mih ki khubor wa em kiwa pyrchah ya u sarok High Speed Corridor uwa man leh kam u sarok 4-Lane uwa daw sdang na Umiam chadooh Ratacherra ha Meghalaya wei uwa daw kut ha Panchgram, Cahar District ka Assam.
Neiliang ki le tylli ki chnong wa em ha Ri-Bhoi wa kyntup ya ka Umdohbyrthih, Umroi Madan wa Labansaro deilang wa kiwi de da pynche yei mih khubor yeiwa em kiwa chong chnong ka Umroi Madan kiwa da pyrchah ya ka luti wow lai uni u sarok neidaw wa daw chah ktah ki tyllong um.
U PB Sylliang, uwa man kam u Waheh Chnong ka Umdohbyrthih kamjooh u Chairman ka Eastern Ri Bhoi Development Forum da khana u wa ha ka 3 tarik uni u bnai da yachem ki wa ki bor District ka Ri-Bhoi deilang ka National Highways & Infrastructure Development Corporation Limited (NHIDCL), wei da pynche wa yei rukom taan namo ka Alignment uni u sarok da leh da ki bru wa pliah namo ki Expert kiwa na baar ymtoh da kiwa napoh ka jylla ki wym tip u leh yeini i kaam.
Da khana u leh wa ka Eastern Ri Bhoi Development Forum nadooh u Naiynñiaw u snem 2019 dadep thoh chithi ki cha u Montri Rangbah wow mynjur ki yei chna ya uni u sarok 4-Lane. Wei da thoh leh cha u DC ka Ri-Bhoi wow lai chkhmat yeini i kaam deiwa pyrkhat leh ya kiwa chong chnong katkam wa emkaam ki.
Heiyatoh wa ka tyllong um ha Umroi Madan, neiliang u PB Sylliang da khana u wa u Engineer na ka Water Resources Department, da ong u wym chah ktah kani ka um wei u sarok leh ym lai u na ki thaw wa mih kani ka um neibhah uni u sarok daw jngai u 60 meter na kani ka um.
Da ban joor u leh wym toh u kyrchaan yei pynkylla ya uni u sarok neibhah lada leh deiwi daw hap u wow lai na ki chnong ki thaw, ki skur, ki madan hadooh ki yungmane.
Chooh chooh da pynche u wa ha ka yalang wa da pynman ha ka 3 tarik uni u bnai da yoh wow ap u sñiaw ya waroh wei da ye u pynbait, ymtoh katkam wa da kam da ki kattu katni kiwa em i yong ki hi i kwah yei myntoi samen.
Kamtæ da ong u wa lada leh da ka Alignment warim daw hap lutsan bha neibhah daw hap wow tympra hadooh ki yung ki sem ki bru.
Heiytatoh won wa i lai pait ya ka tyllong um ha Umroi Madan da u MP ka Shillong, u Dr. Ricky AJ Syngkon, u Sylliang da pynsñiaw u yei sñiawsih neibhah khlem da pyntip u ya ki waheh chong wei da ngait u yeiwa khana ki kattu katni kiwa kwah wow myntoi samen.
Kamtæ da kyntu ya u MP wow yaklam wa ki waheh ka Umroi Pyllun hawa chim rai yow lait u mih i kulmar.
Da pynche ki leh wym em ki bru wa man tre thaw cha ki kiwa man kam ki sahep sorkar næ ki heh spah ki wow yoh myntoi da kani ka Alignment uni u sarok wa katni.
Kini ki waheh chnong da ong ki leh wa 96% kiwa chong chnong kyrchaan ki ya uni u sarok kamwa da thmu chna ya oo.
Discussion about this post