Hadien wa da mih khubor ha u Wyrta wa ha ki kattu katni ki laad pathai khubor, boon ki lok ki jor kiwa Phone wa kylli ya nga chaphang katu ka Wyrta kawa pyrchah ka seiñ All Hynñiewtrep People United Front (AHPUF) wow pynkhle biang ya kitu ki Ticket ka First Prize ki Chi Iung Multipurpose Society wa man da ka Dumper Truck. Neiliang yong nga u Chandame Sungoh da kani ka Wyrta da pynche O ya phi ki lok ki jor waroh wa nga ym embynta O heiyatoh wa kani ka khubor.
Hao, nadooh wa seiñ ya kani ka seiñ haka 11 tarik u Duiyatra ha u snem 2016, nga man O kam u Founder Secretary kani ka seiñ kamwa da yoo phi ya ki kattu katni tylli ki kaam kiwa da leh O hei pyrtuid kani ka seiñ.
Tangwa nadooh u snem 2022 chaneiñ neidaw wa khia palat i kaam heiyatoh wa u pood u ang namo ka Border Issue, tæ ym yoh por de O u embynta lang ha kiwa boon ki kaam kani ka seiñ AHPUF. Da pynlai yumut O du neibynta i kaam pood wa i eh i khoo ki paradoh parasnaam kiwa chong wa sah cha ki thaw khappood wa cha Block-I wa Block-II kamwa kiwa boon nadooh ki bru paidbah wa ki bru sorkar datip ki ya nga heiyatoh wa ini i kaam.
Nga ym beiñ O yei lai luti kiwa yahkhmat kani ka seiñ AHPUF heiyatoh weini i kaam. Kyntu O leh wow yieñ ki haka luti i hok weiwa sakhiat u pynyoh yei hok kiwa boon walang kiwa dadep thied wei dep noh ya kitu ki Ticket yong ki wym toh du kat u chna poisa donhi.
Kam u bru samen uwa em i kitkhlieh heiyatoh waka imlang sahlang dap O dei sñiawkhia ya kam kini wa jia haka imlang sahlang yong i wa dap du i thok i chukor. Jan kat hawa em i khih i kreh, kuhæ i wow yoh syndet wow mahajon lura lura tæ ym kheiñ de i u leh thok leh chukor tæ poi chei dooh burom chei dooh chaniah haka imlang sahlang.
Ini pynhiar dor wei pyndooh nong i ya ka imlang sahlang, nadooh ki sahep sorkar, ki Politician, ki seiñbhalang wa kiwi de ki jait seiñ. Katni leh da boon su i leh thok leh chukor iwa ktah ya ki paidbah kiwa em hei biej wa ki kup chiliang ki sem chiliang. Kini kiwa tip wa stat ki em laad em luti ki hawa seiñ ki yei khih yei khan yong ki wei da yoo kamwa leh buit-tooh namo wa Plan ki yow thok yow chukor yow lute yei khih kiwa dooh wa duk donhi, ym em mynsien wei em i sñiaw neibynta i myntoi yonglang.
E yumut O leh ya ki paidbah khamtam kitu kiwa thied Ticket rap boon wow dawa hi phi yei hok yong phi ymtoh u kut du hei khñium donhi. Nga tæ ym chong hok O u tuklar yeini i kaam neibhah tang kawi ka Ticket leh ym em u thied O. Kyntu O leh ya ki paidbah kamwa da jooh klam wei da jooh thoh O ha ki khubor namo ki Wyrta wa neini chakhmat tæ toh u husiar i u ya thied kam kini ki jait Ticket neibhah kam kini ki jait toh kiwa suk bha ki bru u leh thok leh chukor.
Discussion about this post