Jowai: U Dolloi ka Jowai Elaka hadien wa mih ka khubor wa chah pynbaad wa leh bor wei wym em bood u ya ka kyndon ka Dorbar Chnong heipor wa jied Waheh Chnong ha Pamra Paithlu da ong u wa waroh ini toh i wym em yurim iyi iyi leh.
U Dolloi da ong u wa ha ka sngi jied Waheh Chnong, u Chairman wa chipor u Barius Rymbai da pdiang burom ya u Dolloi wei kamjooh ya kiwa chong chnong wei da khut u leh ya u Waheh Chnong warim u Deilang Rymbai u wa da batai cha kiwa chong chnong yow man ki kiwa ya tylli heipor wa jied Waheh Chnong thymme yow wanrah ya ka burom wa ya i roi i paar hapoh ka chnong.
U Chairman da khut u leh ya u Secretary Chnong warim u Chopring Rymbai wow batai cha ki paidbah yei rai ka Executice Body kawa da tyrwa ya u Lening Star Rymbai wa u Loving Chyrmang wei na pyrdi kini ki ar ngut ki paidbah u chim ki ya ka rai wow jied Waheh Chnong wa u Secretary Chnong.
I chah pynbaad wa i jied Waheh Chnong da em wa chimbynta wa ki na baar ka chnong wei khlem em i soi pyrtuid, u Dolloi da pynche u deiwa ong wa ini toh i kamram yong ka chnong khamtam u Chairman wa pyllai ya ka dorbar chwa wow e kti cha u Dolloi. U Dolloi da ong u leh wa kyrpad u du iwi donhi na u Waheh Chnong warim i tæ toh wow phah pynchong lut ya ki paidbah khang wow suk ka jied Waheh Chnong.
I ong won wa u Dolloi ym tip u ka ka aiñ The Jaintia Hills Autonomous District (Establishment of Elaka and Village and Election, Appointment Powers, Functions and Jurisdiction of Dolloi/Sirdar and Waheh Shnong) Act 2015, toh iwa bakla, da ong u Dolloi, neibhah ka Dorbar Chnong leh da chim ko ya mynjur katkam ka Section 24 wa u Waheh Chnong wow jied thymme u kreh u 3 snem. Kamjooh leh wa ka Section 23 heiwa ki paidbah da mynjur ki wow jied Waheh Chnong katkam ka Dustur warim wei da tyrwa ki paidbah u leh lyngba i kyriaw.
Kamtea u Dolloi da ong u wa ym em leh bor u neibhah iwa leh u toh iwa da mynjur da ki paidbah ha khmat ki wa yahkhmat warim ka chnong.
I jied Waheh Chnong toh iwa chongkhia chongkun wei kawa lai bait heiwa kiwa da chah jied da pdiang ki wei da kular ki wow kreh hok ha khmat ka Dorbar Chnong wei da soi pyrtuid ki leh ha ka Register u Dolloi yow pynsakhiat yeini waroh.
Hadien ini u Waheh Chnong thymme na ka liang ka chnong lyngba u Waheh Chnong warim ha khmat ka dorbar da e kti u ya ka Seal Waheh Chnong, ki kot ki sla wei da pyndein leh ya ka badge yong ka chnong kam ka dak pynkup bor ya u Loving Chyrmang kam u Waheh Chnong ka Pamra Paithlu.
Hei yatoh won wow kyrpad ya ka JHADC wow pynman biang ya ka jied Waheh Chnong, u Dolloi da ong u wa ini toh i wym chong nia neibhah ktah ko ya ka burom yong kiwa chong chnong kiwa chimkhia wow pynman ya ka tai ka sngi chong dorbar chnong kawa Tip Bru Tip blai pynkut u Dolloi.
Also Read: Pynrem ka DC Pamra Paithlu yei rukom pyllai jied Waheh Chnong u Dolloi ka Elaka Jowai
Discussion about this post