theme-sticky-logo-alt
theme-logo-alt
Advertisement ad1

Pynche u Dr. Donald Bareh yei emkaam wow bood kyndon wot hadien wa chim tika

Kam chibynta wow khoom u kdoh yei poor wa i ktah u khñiang khlam COVID-19 ya ki paidbah, neiliang ka sorkar pyrdi kamjooh wa ka sorkar jylla hajrong ki kyndon wa da booh wow bood ki paidbah wow yada na uni u khñiang da kyntu ko leh wow wan chaphrang wow chim ya i tika yada na uni u khñiang. 

Heiyatoh wa i tika, kiwa boon ki paidbah da artatien ki ya ini i dawai deiwa booh ya ki daw wa ha rukom khamtam deiwa kylli neiyi i daw wa dang haap bood ya ki kyndon yada COVID-19 hanlada dep chim ya i tika. 

Hajrong ini neiliang u Wyrta da yaklam wa u Dr. Donald R Bareh uwa man kam u Medicine Specialist ha Supercare Hospital, Shillong wei uwa jooh sumaar ya ki bru wa chah ktah ha uni u COVID-19 heiwa da kdaw u wa ha u snem wa dadep da hap bood ya ki kyndon yada kam wow sap ki mask, u sait-kti dei langær, wow jngai na ki thaw paidbah tangwa nei kreh chitom ki stat Science da chem ki ya i tika wow yada na uni u khñiang heiwa da kyntu u ya ki paidbah wow chim kabu ki wow wan chaphrang wow chim tika.

U Dr. Donald da pynkynmoo u wa ha u snem wa dadep (2020) i man i long u COVID-19 toh uwa dang tlot tangwa ha uni u snem da mih u Delta Variant uwa rap khlanbor heiwa katkam ka yukheiñ wa da yoh uni u Variant khlan u 20 chah, iwa mut wa lada em uwi wa chah ktah- na uni samen daw poor u khñiang cha ki 20 ngut kiwi tawon wei kawi na ki laad wow yada hi toh deiwa chim ya i tika. 

Chooh chooh da ong u hadien wa chim tika dang du chisien leh wei lada ki bru chah ktah ki ha u COVID-19 ymye de u wow ktah joor ya ki bru. 

Da pyntip u leh wa neiliang ka Ministry of Health and Family Welfare ka sorkar pyrdi da pynche ko wa ki kynthai kiwa e yimbu khon wa kiwa pun-khon leh da ye ki wow chim ya ini i tika neibhah wa man chngaaiñ i. 

Heijooh i por da ong u wa lada tieñ phi yei chitom (Side Effect) hadien wa chim tika, toh u rap tieñ chooh chooh phi yeiwa uni u khñiang COVID-19 u leh u ya i doh i pran yong phi. 

Heiyatoh wa i kylli ki bru wa neiyi i daw wa emkaam u sap mask wei wow bood kiwi ki kyndon yada COVID-19 wot hadien wa dadep chim tika, neiliang u Dr. Donald da pynche u wa mar yoh ya i tika, i dawai ym krehkaam i pyn-heitu wei dang chimpor wow krehkaam i wei kat hadooh itæ i por dang emkaam hi wow bood ya ki kyndon wa da booh ka sorkar. 

Share this:
Previous

Pynlait dakha ka FJC Elaka Sumer ha Umsang

Next

Le sngi pteiñ i boon da kiwa chait ya kiwa yoh COVID-19 ha Meghalaya