theme-sticky-logo-alt
theme-logo-alt
Advertisement ad1
Advertisement ad1

Pynche u heh ka NEIPF hajrong i chah pynbaad u

Advertisement ad1

Jowai: U Marshall Biam hadien wa mih ki pynbaad pyrchah ya oo da ki kattu katni ngut ki bru kiwa kwah u dai sarom wei wow pynsih ya ka mynried yong oo da pynche u deiwa ong wa ini da sdang i hadien wa ki dkhot ka seiñ North East Indigenous People’s Federation (NEIPF) da ujor ki pyrchah ya u S.I. Habanjop Khonglah u OC yong ka Khliehriat ha ka 01-11-18 hajrong wa khrong poisa be-aiñ wei heijooh i por ka seiñ da yoh yutip ko wa ki pulit chim poisa na ki truck kiwa lai lyngba u sarokbah yow yoh ki u lai khayi.

Hadien ini ha ka 06-11-18 ki kattu katni ngut hapoh i yahkhmat yong u Graham Lyngdoh da khut ki ya u Marshall wow wan cha Sohshrieh Takhniang, Tuber Kmaishnong  neibynta wow yaklam sñiawthooh hajrong ka tai ka ujor, tangwa manda poi ha i tai i thaw da pynbor ki ya u Marshall wow pyndam noh ya ka ujor. Kamtæ neiliang u Marshall da pynsñiaw u wa ym toh oo wa booh ya ka ujor tangwa da pynboor bait ki oo deiwa ong wa kam uwa ha khlieh dooh ka seiñ ye u wow pyndam noh ya kani ka ujor.

Advertisement ad1

U Marshall da pyntip u wa hadien ini da kit ya oo da kawi ka kari Scorpio wei da li yah ya oo cha ka yungkrehkaam yong u SP East Jaiñtia Hills, Khliehriat wei da yah ya oo wow yachem wa u SP wei heini kini ki bru da pynbor ki ya u oo wow pyndam u ya ki ar tylli ki FIR kitæ kiwa booh ha ka 22-10-2018 wa ka 01-11-2018. Hadien wa da mih na kamra u SP da yah ya oo cha Lad Rymbai wei ym e laad ya oo wow pynbait ya kani ka kaam wei kini ki bru da pyrchang ki wow kit ya oo cha cha kiwi tawon ki thaw wei da maham ya oo ryngkat wa ki ktien khlemakor kamjooh ya kiwa ha yung ha sem yong oo. Ha ini i por u Marshall da ong u ya ki wa toh u yah ya oo cha Lad Rymbai Road khnang wow yoh u chim ya ki kot ki sla wa emkaam.

Tangwa manda poi ha Rymbai Road da em ki paidbah ki wym duna ya ki spah ngut kiwa da yang chwa wow dat wow bom ya u Marshall wei da yoh u yut wei da psiah u hapoh iwi i dukan dai kwai wei da yoh u Phone cha ki pulit ka Lad Rymbai cha uwi u S.I. tangwa ym em wan yarap u kamtæ da phone u cha u SP uwa da phah ya u S.I. Lamare wow wan yarap ya u Marshall ha katai ka por.

U Marshall da ong u wa heipor wa da em u ha kti ki pulit u DSP, ki paidbah dang yoh bait ki wow dat wow choh ya oo (Marshall).

Neini i pynbor ware ya u Marshall da pyndam noh u ya ka ujor ka seiñ ha ka 06-11-2018 hanlada ym toh oo wa soi pyrtuid kawa man pyrchah yei rukom krehkaam ka seiñ yong oo.

Hadien ini won u Marshall da ujor FIR u pyrchah ya kitai ki bru kiwa kynthup ya u Graham Lyngdoh waheh chnong ka Tuber Kmaishnong, u Hamlen Rymbai, u Cheerful Ryngkhlem, u Rock Sympli, u Nidamon Chullet, u Defender Pakam wa u Sambormi Lyngdoh.

Heiyatoh won wa mih khubor wa lute u ya ki trok wei siat suloi kawa da pynbaad wa jai ha 5 tarik uni u bnai, u Marshall da ong u wa man ko du ka thok suda kawa khlem yurim wei ka wym em sabut iyi iyi leh neibhah wa ha ka tai ka sngi, ha i por miet em u ha yung neibhah wa yang u ya ki lok yong oo kiwa wan emkaam cha yung u.

Chooh chooh u Marshall da ong u wa ini waroh toh i chna buit yong kiwa ujor FIR ya oo wei lada man ko kawa sakhiat neiyi i daw wym kem ya oo ha ka sngi wa bood wa lai mih u cha ki pulit ha ka 6 tarik uni u bnai. Ini waroh man ko kawa sñiawphylla hadooh kattæ kattæ wa ya kini ki bru hadooh kattæ leh ym em kem ya ki wei da thooh kdong bait ki oo (Marshall) wei neiliang yong oo da kyrpaad joor u wa neiliang yong ka aiñ wa ki pulit wow pynchitom ya ki katkam ka kyndon yong ka aiñ.

Khaddooh u Marshall da ong u wa katkam wa pynmih khubor u SP ka East Jaiñtia kawa ong wa u Marshall da wan mih u cha ka yung krehkaam u SP wow pyndam ya ka FIR ha ka 05-11-2018, kani leh man ko kawa bakla wei ka wym ye u pdiang neibhah ya katai ka kaam da pyndep ha ka jooh ka sngi wa da pynbor ya oo ha ka 06-11-2018 wei ya kani da pdiang wei soi da u Dy. SP u G. Marshillong MPS ym ha ka 05-11-2018 tangwa ha ka 06-11-2018 kamtæ u Marshall da kyntu u ya ki paidbah wym toh u ngait ki yeiwa chah pynbaad u ha kini ki bru neibhah da yoo yeiwa thok ki.

 

Share this:
Previous

Jop ka Iong-i-da-hi ha ka 3rd Division

Next

Neidaw wym em phah muktiar rah sngi ka SC wow bichaar khaddooh ya ka kaam tih mooyong