Ka 9th International Day of Yoga 2023 da lehkmen ya ka ynnin ka sngi ha Community Hall, NEHU Campus, Umshing, Mawkynroh kawa da pynman da ka Health & Family Welfare Department deilang waka National AYUSH Mission, Meghalaya heiwa ka Montri ka Health & Family Welfare Department, ka Dr. M. Ampareen Lyngdoh da wan ko kam ka kongsan.
Ka kongsan hawa e yei klam da ong ko wa ka Yoga toh kawa da rim bha kawa da pynyoo yei myntoi nadooh kitu ki por wa yarap ko ym du yei doh i pran kamjooh yei chait i khiah i bor pyrkhat pyrdaiñ lada myllien u leh.
Da ong ko leh wa ya ka Yoga ha kini ki snem wa da dep da pdiang ya ka ha waroh kawi ka pyrthai kawa da man kam i dawai yow yoh yei chait i khiah.
Kamtæ da ong ko wa ka sorkar leh toh kawa da chimkhia yow pynchlur u leh Yoga neidaw wa yoh boon i myntoi wei da pynchlur ko leh ya waroh wow sdang u leh Yoga khamtam ya ki Nurse kiwa da emlang ha kani ka sngi kiwa khia yukit hawa kreh kamjooh leh ki Doctor wow leh Yoga ki hei thaw wa kreh ki.
Ha kani ka yalang da pynlait leh ya ka YSLife iwa mut Yoga Simplified for Daily Life yow pynsñiawthooh lada em i sñiawthooh bakla chaphang ka Yoga yow yoh yei chait i khiah khamtam ha kini ki por wa boon kiwa yoh kjut hapoh ka jylla.
Hadien ini da pynman yei leh Yoga deiwa chimbynta ki Nurse na ka Nursing School ka Shillong Civil Hospital wa Ganesh Das Hospital.
Da ya emlang leh u Dr. Joram Beda, Commissioner & Secretary, Health & Family Welfare Department, ka RM Kurbah, Deputy Commissioner, East Khasi Hills District wa kiwi de.
![](https://i0.wp.com/wyrta.com/wp-content/uploads/2023/06/yghthr1.jpg?resize=962%2C642&ssl=1)