U Lahkmen Rymbui uwa man u Montri ka sorkar jylla hawa klam kam u kongsan ha ka yalang wow e Certificate ya kiwa da pyndep yei chah hikai, da kyntu u ya ki khynnah wa toh u kmen wa da yoh kreh ki wei toh u man ki leh kam kiwa e kreh ya kiwi.
U Dr. H.H. Mohrmen hawa klam lamphang da sñiawngooh u ya ka chnat Border Area Development wa lyngba u Lahkmen uwa man u Montri kani ka chnat wa da ye u wailaad ya ki khynroo ka thaaiñ wow ye ki wow yieñ hajrong ki yong ki ki kjat wow seiñ kreh. Ha kani ka sngi hajrong wa da e ya ki Certificate cha kiwa da pyndep yei chah hikai, da saam leh ya ki tiar (Startup Kits) yow ye ki u pynemkaam yow sdang yei kaam yong ki.
Kini ki khynroo kiwa da pyndep ya i chah hikai toh kam ha i chet baam Street Food wa kamjooh wow chna ya ki baam na ki soh ki pe (Food Processing) ya kawa da pynman da ka Society for Urban and Rural Empowerment (SURE), Jowai.
Ka SURE da pynman ko ya ka e sikai ha ki soo tylli ki chnong kiwa haap hapoh khappood kitæ ka Nongtalang, Amlarem, Darang wa Nongbareh. Hadooh 147 ngut ki khynroo khyllood na ki thaaiñ khappood waka Bangladesh hapoh ka Amlarem Sub-Division da myntoi ki na kani ka e sikai lyngba i yoh yarap poisa na ka Border Area Development yong ka yung krehkaam u Deputy Commissioner West Jaiñtia Hills District.
Ka yalang ha kani ka sngi da man ko ha Syiem Jingsuk School, Amlarem heiwa da emlang leh ka Y.R. Mawlong kawa man ka SDO (Civil) yong ka Amlarem Sub-Division, u Lambormi Suchen, District Skill Development Officer, u Rev. Fr. G. Shangpliang wa kiwi kiwi.
