Ka Chaad Sukra toh ka samoi chaad kmen chaad sñiawbha wa yalai lang chirup wa ki sarin yong ka ñiam ka rukom, ka dustur riti haman ki Raij ki chnong wa pynman ya ka, kamtæ ka chnong Sabahmuswang leh hei pait i pynlai ka Seinraij Sabahmuswang ha ka sngi Muchai 17 Naitung da pyndep ki ya ka Chaad Sukra hapyrdi i yoo phooh yoo phieñ dei chimbyntalang ki khon ka chnong ka raij.
Ya kani ka Chaad Sukra dawan sakhilang da u Wailadmiki Shylla, MLA kam u kongsan, u Brightstar Chyrmang, MDC, JHADC kam u symbood kongsan, u Pa Dolloi ka Elaka Jowai, u Puramon Kynjing, u Dr. Rev. H.H. Mohrmen, u H.R. Kurbah, President Sengkhilang wa kiwi kiwi kiwa chah khut sñiawbha na ki raij ki chnong waphær.
Kam wow kdar luti ya ki bynta wa chakhmat yong kani ka sngi, da em ka yalang yahkhmat hei pynlai u President ka Seinraij Sabahmuswang heiwa da yoh leh i ngoohblai ngoohsyiem da uwi na ki khon khynroo neitæ i klam pdiang burom na u Dajan Kyndait, Secretary Chnong Sabahmuswang kamjooh ki kyntien e mysnien ya ki khon ka chnong Sabahmuswang na u Tellme Phawa, Waheh Chnong Sabahmuswang katwa kiwi kiwa da pachat ya ki kyntien kitbok kitrwiang toh u Helping Phawa, Seinraij Tuber, Dr. Rev. H.H. Mohrmen, u Puramon Kynjing, Dolloi Elaka Jowai, u H.R. Kurbah, President Seng Khihlang kamjooh ki kyntien kyrpang na u Wailadmiki Shylla kam u kongsan wa u Brightstar Chyrmang kam u symbood kongsan.
Ka Seinraij Sabahmuswang ha ka thong wow pynneh pynsah wei pynjanai ya ka rukom dustur, riti da ekti ko leh ya ka dorkhat ha u kongsan heiwa neiliang yong oo da kular u wow yakrehlang wei chooh chooh hei klam da yaroh u leh ya ki khon ka chnong Sabhamuswang kiwa da chimkhia sakhiat u pynneh pynsah wei pynmiat pynjanai ya ka rukom dustur wa da pynjooh sikai u warim manchaw longchwa.
Ki rukom chaad kiwa ki khon ka Seinraij Sabahmuswang ku tyngkong ki wow pynyoo ha kani ka sngi toh ki Chaad Rwai, Chaad Pliang, Chaad kyllaiñkti, Chaad Rep wa kiwi kiwi wei chooh chooh da pyntympang, pynchoh wei pyncongchit ya kani ka Chaad Sukra dei ood i thai ki sur wa mih na ki ki tiar put tiar tem yongrim wei ini man i leh ka dak yong i sñiawsarong ya ki khon ka chnong Sabahmuswang kiwa dang ye u bood u ksooh yei sikai ki warim hei wow pynemkaam ya kini ki tiar hadooh kini ki sngi.
