Ka Meghalaya High Court ynne da chong bichaar ko ya ka mukotduma wa da yaleh da u Enamul Hoque pyrchah yei pynbna ka GHADC wa emkaam ya ka ST Certificate ya ki kyrtong wa thap pyrtuid wow yaleh MDC.
Neiliang uwa yaleh mukotduma da ong wa kam uwa thap Vote, kani ka hukum ka GHADC man ko pyrchah ya ka Assam and Meghalaya Autonomous Districts (Constitution of District Councils) Rules, 1951 heiwa da dawa wow pyndam noh ya kani ka hukum wa da pynmih da ka Council ha ka 17-02-26.
Neiliang u muktiar uwa yaleh mukotduma da ong u wa kani ka pynbna da leh khlem da bood ki kyndon ka aiñ wa ki kyndon ka Para 2(6) ka Sixth Schedule najrong wa da kdaw leh wa ha ka Rule 128 uwa man kam uwa thap Vote ye u leh wow chimbynta ha ka Election hanla ym em man u kam u Schedule Tribe lait noh wym em man u kam uwa chong chnong wa pura hapoh u pood ka Autonomous Council.
Hajrong ini da ong wa ka GHADC da lai ko palat yei bor yong ka hawa pynmih ko ya ka hukum wa emkaam ST Certificate wei yei pynbna leh da pynmih khlem da yoh yei mynjur u Lat.
Da kdaw leh wa hapoh ka GHADC, ki Non-Tribal nadooh wa sdang da em bait ki kam kiwa thap Vote wei da man ki leh kam ki MDC hadooh kini ki sngi.
Neiliang won u muktiar wa yaleh pyrchah ya ka mukotduma da ong u wa ki thaw wa man kam ki Tribal Area nadooh ha Assam, Meghalaya, Tripura wa Mizoram, da kylla i rukom em kiwa chong chnong wei i hok kiwa man kam ki Indegenous Tribal hap wow yada ki kamtæ da pynmih ya ka hukum katkam ka Rule 29 (a) and (b) wa Rule 30 ka Assam and Meghalaya Autonomous Districts (Constitution of District Councils) Rules, 1951 iwa da pynkupbor ya ka Executive Committee wow leh yeini deiwa e nongmuna leh ya kawi won ka mukotduma heiwa ka Para 2(7) ka Sixth Schedule da e bor ko ya ka District Council wow chna ki kyndon.
Hadien wa da ap yeiwa da yasaaid na waroh ki liang, ka High Court kdaw ko leh ya ka Article 244 (2) ka Constitution deiwa em leh ka Sixth Schudule ka wow krehkaam ha Assam, Meghalaya, Tripura wa Mizoram heiwa da sdang leh ki District Council yow yada ya ka rukom im, ka riti dustur, ki ktien ki thylliej kiwa man kam ki jaitbru Tribal wei da e bor leh ya u Lat wow chna ki kyndon neibynta ki District Council.
Ka yung bichaar da kdaw ko leh katkam ka Rule 8 (Qualification for membership), Rule 29 (Function of Executive Committee), Rule 30 (Savings), Rule 72 (Legislation) wa Rule 128 da ong wa kiwa kwah wow yaleh Election ka District Council toh u man u ki kam kiwa chong chnong ka ri India, ymtoh wow em duna ya 25 snem wei man ki leh kam kiwa thap Vote ka Autonomous District Council.
Kamtæ heiyatoh wa ka GHADC nadooh wa sdang ka ha u snem 1952, ki Non-Tribal kiwa man kam kiwa chong chnong da chimbynta ki wei da chah jied ki leh kam ki MDC tangwa yeiwa e daw wa da kylla i rukom man kiwa chong chnong, ka High Court da ong ko wa u pait donhi ko lada i pynbna man ko katkam ki kyndon ka Assam and Meghalaya Autonomous Districts (Constitution of District Councils) Rules, 1951.
Hajrong ini da ong wa ini i pynbna ka Executive Committee deiwa leh hapoh ka Paragraph 2 ka Sixth Schedule yow pynkrehkaam katkam ka Rule 29 ka Assam and Meghalaya Autonomous Districts (Constitution of District Councils) Rules, 1951 tangwa ym em da wanrah ka hakhmat ka Council yow yoh yei mynjur wei da leh du da ka Executive Committee donhi.
Da ong leh wa katkam ka Rule 72 da ong wa emkaam leh yei mynjur u Lat chwa wow man aiñ ko deiwa lai luti chwa na ka District Council Affairs Department chwa wow phah cha u Lat, kamtæ kani ka pynbna man ko khlem da bood ya ki kyndon heiwa da man ko kam i tyrwa donhi yow pynkylla ya ka Rule 8 wa Rule 128 ka Rule 1951.
Kamtæ deiwa pait yeini waroh, ka High Court da rai ko wow pynyap noh yeini wa da pynmih hukum ka GHADC neidaw wym em man ko katkam ki kyndon ka aiñ.
Discussion about this post