Ka Supreme Court haka 15 tarik uni u bnai da pyndam noh ko ya ki Electoral Bond kawa man ka laad wow e sñiawbha cha ki Political Party khlem da khana yei pyrtuid kiwa e.
Ya kani ka mukotduma da sdang wow chong bichaar nadooh ka 31 tarik u Naichiphaw u snem wa dep deiwa em kiwa pyrchah ya ka Electoral Bond Scheme deiwa ong wa kani man ko pyrchah ya ka synchaar paidbah kamjooh pyrchah yaka Article 19 (1) kawa e yei hok ki paidbah wow tip ki chaphang ki kyrtong yaleh Election kamjooh ka poisa wa yoh ki Political Party.
Chooh chooh da ong leh wa suk bha u pynbaam poisa lyngba kani ka Scheme da kiwon kiwon wei pynchlur ko ya kiwi ki kaam yow pynemkaam bakla yaka poisa.
Kani ka Electoral Bond Scheme toh kawa da wanrah da ka sorkar NDA ha u snem 2018 yow wai laad ya ki bru wow e poisa ki cha ki Political Party khlem da khana kiyi wa e ya kani ka poisa wei ym toh dan (Tax) ki manda leh ki yeini.
Kini ki Electoral Bond toh kiwa ye u thied da kiwon kiwon ki bru kamjooh ki Company wot kiwa na baar ri wei kiwa ye u pynemkaam du neibynta wow e cha ki Political Party wei da dai ya ki da ka State Bank of India donhi hei dor wa Rs. 1000, Rs. 10,000, Rs. 1 lak, Rs. 10 lak wa Rs. 1 klur.
Kini ki Bond toh kiwa ye u thied lyngba ki Account wa biang ka KYC wei ki Party manda yoh ki ya kini ki Bond hap ki wow lai pynkylla ki cha ka poisa hapoh i por wa da booh.
Kiwa thied ya kini ki Bond ye ki wow thied katwa ngait ki wei ym em booh kyndon katwon tylli ye ki u thied kamjooh hadooh katwon wa hoi u thied.
Ki Political Party wa ye u yoh ya kini ki Bond toh du kiwa da tipmit hapoh ka Section 29A ka aiñ Representation of the People Act, 1951 kiwa da yoh ym duna 1 Percent ka Vote ha ka Election Lok Sabha wa khaddooh wa da yaleh.
Ka sorkar pyrdi hawa e yei daw da ong ko wa kani ka Scheme toh kawa pyntikna wa khooid wei yow lait nei pynemkaam da ka poisa kawa ymtip neiwon heipor Election.
Ini wa leh ka Supreme Court ye i u ktah dooh yaka BJP neibhah 60% ki Bond wa thied toh kiwa da e cha ka heiwa ka Congress da em ko hei wa ar.
Nadooh u snem 2016 hadooh u snem 2022 da dep dai 28,030 tylli ki Electoral Bond kiwa da chongdor Rs. 16,437.63 klur heiwa Rs. 10,122 klur iwa man 60% toh kiwa da lai cha ka BJP, katkam ka yukheiñ ka Election Commission.
10% na kini ki Electoral Bond da lai ki cha ka Congress iwa dapoi Rs. 1,547 klur neitæ 8% da lai cha ka TMC kawa da yoh Rs. 823 klur, wei kiwi de ki National Party wa da yoh toh ka CPI (M) Rs. 367 klur, NCP Rs. 231 klur, BSDP Rs. 85 klur katwa ka CPI won Rs. 13 klur.
Lada ym pynemkaam da kini ki Electoral Bond, waroh ki Political Party hap ki wow khana kiyi kiwa e sñiawbha cha ki Party wei ini man ko du neibynta kitu kiwa e Rs. 20,000 chaneiñ wei lada e da ki Company ymtoh u e ki palat ya 7.5% naka nong wa yoh ki næ palat 10% naka poisa wa pynmih ki.
Discussion about this post