U Lamphang ka Yung Dorbar Chna Aiñ ka jylla Meghalaya, u Thomas Sangma da pyntip u wa u Ronnie V Lyngdoh ym kwah de u wow pteiñ ya ka PIL wa ujor ha Meghalaya High Court pyrchah ya ki 3 ngut ki MLA warim ka Congress kiwa da lai psiah cha ka NPP ha u Naisaphra ynnin u snem.
Katkam wa khana u Lamphang, u Ronnie uwa man u MLA ka Mylliem da thohlang u ha ka chithi wa ym em de i thmu wow pteiñ yei yakhun mukotduma pyrchah ya ki para MLA warim ka Congress, wei neiliang u Speaker da ong u wa ya kani ka rai Ronnie daw pyntip cha ka High Court da u muktiar yow leh yeiwa emkaaam.
Kam wow kdaw heini wa u Ronnie da yaleh u da ka PIL yow pyndooh noh yei man MLA ki 3 ngut hadien wa da mih ki na ka Congress yow psiah cha ka NPP wa kynthup ya u MLA ka Umsning, u Dr. Celestine Lyngdoh, u MLA ka Mawhati, u Charles Marngar wa u MLA ka Nongstoin, u Gabriel Wahlang.
Ha kawi won ka liang u Lamphang da pyntip u leh wa i mih yong u Ronnie na ka Congress yow psiah cha ka NPP man ko katkam ki kyndon wa da booh ha ka 10th Schedule ka riti synchaar ka ri.
Discussion about this post