Jowai: Ka lehkmen dap 100 snem namo ka Centenary Celebration ka Iungwalieh Chilliangraij (Khonraij), Jowai da wan pynhaap pyrda yaka da u Wailadmiki Shylla, MLA ka Jowai hei sakhi lang u DC ka West Jaiñtia Hills, kiwa yahkhmat ka dorbar chnong wa kiwa chong chnong ynnin ka 14 tarik.
U waheh chnong u D.H. Pde hei klam yong oo da pynsñiaw u ya chiboon ki kaam waka chnong da lai luti ko neibynta i bha i miat ka chnong ka thaw.
Neiliang u DC da ong u wa kani ka sngi man ko ka sngi sah kynmoo wow kyruiñ chaki 100 snem wada lai, “Waroh i kiwa heh yoo i yei kylla i por, wa ye u chynna daki khmat wa ku ka puræ puthi, tangwa i manbru long bru won hiar ko neipor cheipor”.
Da ong u wa hawa hiar ka longbru manbru, ini mut hiar ha u bru samen, hiar ka yung ka sem, ha chong ka thaw wa ka imlang sahlang. Kamtæ ini toh i por u kynmoo u pyrchang pynkylla ya samen samen nyngkong chwa neitæ ha yung ha sem ter ter yow ye u jop.
Neiliang u Wailadmiki da ong u wa kani ka sngi toh wow sahkynmoo warom ya kiwa seiñ wa pynman yaka chnong hadooh katni, “100 snem wym toh de i por wa tbian heiwa da em boon pateiñ kiwa heh wa sian wada emkti wow yarap nadooh ki paaid chong chnong hei yathoh wa kani ka Iungwalieh”.
Da ong u leh wa ka sor Jowai man ko kawa phær tam neibhah katwa nanglai i por nang ku nang ku ko neibhah wa em ki yei mynsien wow ya krehlang haki kaam chnong kaam thaw nadooh i pynman ya ki chaad tynre kam i chaad Chukra, neitæ i pynman yaki chaad lehkmen waphær waphær wa kiwa boon kam ki Fete neibynta u ku ka chnong ka thaw.
Da e yaroh u leh yaka chnong wei yoo luti u wa neini chakhmat u nangku ko chakhamat ha waroh ki liang. Da pyllait paidbah u leh yaka kot thup sahkynmoo kawa e pyrtuid Ka Muhor Ksiar.
Also Read: Sdang i lehkmen dap 100 snem ka Yungwalieh ka Chilliangraij Jowai
Discussion about this post