Ka Kiang Nangbah Govt. College Jowai ha ka 21 tarik uni u bnai da leh burom ko ya waroh ki khynroo khyllood wa lai puræ yong ka kiwa da pyndep ya ka Graduation ha uni u snem 2026, ha ka yalang wa tip kam ka Graduation Day Ceremony wa da pynman ha Auditorium Hall ka College.
Ha kani ka yalang leh burom namo ka Graduation Day Ceremony, u Deputy Commissioner ka West Jaiñtia Hills District, u Abhinav Kumar Singh da wan u kam u kongsan, hei emlang kiwa sikai nadooh u Principal ka College, u H. Toi, u B.N. Lamare, Retd Principal uwa man leh u President ka Alumni Association ka Kiang Nangbah Govt College, ki khynroo khyllood wa dang puræ katni wa kiwi.
Ha ini i leh burom da pynkup burom kyrpang leh deilang ki Certificate ya kiwa rap poi chakhmat kam kiwa yoh Grade O, A+ wa Grade A.
Neitæ da e Certificate leh ya kiwa sikai kiwa man ki khlieh yong ki chnat puræ waphær waphær.
U Deputy Commissioner hawa klam ha kani ka sngi da e khublei u ya ki khynroo khyllood wa da ye ki u kaap chilliang ya u moomær i puræ puthi hei im yong ki, deiwa ong leh wa i kreh chitom wa i chlur man iwa kongsan hei im i ha chirup i kyrchaan wei e mynsien kiwa sikai wa kiwa ha-yung ha-sem.
Hawa pynkynmoo ya ka nongmuna u Kiang Nangbah kamwa ya kani ka College da e naam hei pyrtuid yong oo, wei kamwa i ktien imsngi ka College ong ko, “Awake, Arise and Reach the Goal”, da kyntu u ya ki khynroo khyllood kiwa da man kam ki Graduate wow bood ki ya kini ki nongmuna wei wow man kiwa chlur.
Kyntu haroh u ya kiwa pyndep puræ Graduate na kani ka College wow man ki kiwa sñiawkhian, wa kreh chitom wei chlur lada toh neibynta u pteiñ yei puræ wa rap chakhlieh, lada toh u kreh hei kaam paidbah, i kaam yong samen næ seiñkhih seiñkhan wa kiwi.
Pynsñiaw u leh wa i stat i tip ymtoh u sahkut i du hei jop samen tangwa u pynemkaam leh ya ka neibynta i bha i miat yong ka imlang sahlang wa ka jaitbru.
Hawa yaroh yei kaam wa bha kiwa yahkhmat, kiwa sikai, kiwa kreh, ki bei ki pa wa ka seiñ kiwa puræ næ ka Alumni Association neibynta u pynwandur ya ki khynroo khyllood puræ, yooluti wa kini wa da pyndep yei puræ leh u yakrehlang ki neibynta u rah yei naam i burom yong kani ka College.
Kiwi won wa klam e mynsien ki ya ki khynroo khyllood wa kynthup u H.Toi wa u B.N. Lamare.
Ha kani ka sngi da yoh leh i rwai na ki khynroo khyllood puræ kani ka College.
Discussion about this post