Kamwa datip wa ka Bamphalar toh kawi na ki rukom dustur lehkmen leh sñiawbha wa da leh da pyndep ha chnong Jowai da ki kattu katni tylli ki dong ki chnat chwa wow pynhiar pynhaap yow symbe u phniang cha hali pynthor kamtæ hadien i ye ka dong Panaliar, Dulong, Loomiongkjam waka Chilliangraij wow pyndep ya kani ka rukom dustur ha kini ki tayaw wa dep.
Ka dong Loompyrdi Iongpiah leh ha ka yurim wow pynim pynneh pynsah ya kani ka rukom dustur wa pynjooh sikai na warim, ha kani ka tayaw yong ka sngi Musiang 26, sngi Muchai 27 waka sngi Pyngkat 28 Naisan da pyndep ko ya kani ka rukom dustur deiwa pynman i lehke Drama ha ki ar miet neitæ i ya baamdoh sñiawbha ha yungwalieh da waroh ki khon ka dong ka chnat.
Ya kani ka Bamphalar ka dong Loompyrdi Iongpiah da wan sakhilang leh da u Wailadmiki Shylla, MLA wa u Andrew A. Shullai, MDC wei ya ki parom yong ki Drama da thoh wei pyntoh pyntne da ka Seiñ Kynthai kawa da e pyrtuid “Heiwon Chong I Suk” wa kawi won kawa da thoh da u Lakhon Pyrbot wa da e pyrtuid “Tbian I Pyrkhat”.
U Wailadmiki Shylla hawa klam kam u kongsan da yaroh u ya ka Loompyrdi Iongpiah kamjooh ya kiwi ki dong ka chnong Jowai kiwa dang ye u pynim pyneh pynsah wei pynjanai ya kani ka rukom dustur wa pynjooh sikai na warim wei da ong u leh kani man ko ka dak yong i sñiawsarong yei man kyrpang ka jaitbru.
Chooh chooh kam uwa mihkhmat wa im u chakri yei miat i bha ka imlang sahlang da niawtang u leh wow khana pynsñiaw hakhap u waboon walang ya ki kaam wa yatoh wei roi i par, i miat i bha ka chnong ka thaw kiwa man ha ki rukom waphær waphær.
U Alan Niangti, Waheh Chnong Loompyrdi Iongpiah hei klam yahkhmat da ong u i ye u pynneh pynsah wei pynjanai ya kani ka rukom dustur katkam i yah ka juk ka por toh iwa emkaam bha neibhah katni ki sngi da em chiboon ki seiñ thooh bniah, thooh tre kiwa kwah u tip chaphang kani Bamphalar wei chooh chooh e u leh i sñiawngooh wa khroo ya ki khon ka dong ka chnat kiwa da embynta na ki por cha ki por ha ki Drama waphær waphær ha kam kani ka por Bamphalar.
