Ynne ka sngi ki khon Niamtre ka Raij Ialong da pyndep ki ya ka lehniam Behdieñkhlam ha Madan Aitnar heiwa u Dolloi ka Elaka Jowai, u Puramon Kynjing da man u kam u kongsan hei emlang kiwi ki heh niam yong ki Seiñraij waphær waphær.
Ya ki lehniam wa boon bynta yong kani ka Behdieñkhlam da sdang ha ka 4 tarik uni u bnai heiwa da pyndep ya ki sarin ka lehniam katkam wa da pynchong pynthiah da ki warim wajah nadooh i ngooh i dem, ki kñia wa kiwi kiwi.
Ha kani ka sngi waroh ki rong wa da wanrah ha Aitnar da em ki 10 tylli kiwa kynthup na ki dong ka chnong Ialong, Wahiajer wa Nongkhyllep wei ha ki rong da thoh ya ki kyntien wow bood hei wow yakhun ya ka khlam COVID-19 khamtam i myntoi wa i pynchlur wow chim ya i tika yada na uni u khñiang.
Kam u kongsan, u Dolloi ka Elaka da ong u wa ya ka lehniam Behdieñkhlam da pyndep katkam ka yurim khamtam hapoh ka Elaka Jowai heiwa da pynchon pynthiah ya ka Dustur Riti wow tayar hei rukom im kam ki bru neibynta i Synchaar Raij Synchaar Chnong yow em ka niam ka wow pyndep yonglang yongbi da ki Langdoh, ki Sangot, ki Maji, wa kiwi kiwi wow engooh ya ki Blai yow yoh ya i da i kær wa i kyrkhu na ki.
Neiliang u Pyrkhat Shylla uwa man kam President ka Seiñraij Ialong da ong u wa ya kani ka Behdieñkhlam ha u snem 2020 wa ha uni u snem 20121 da yaleh wow pynduna ya kiwa chimbynta wei da yaleh wow bood ryntih ya ki kyndon wa da booh da ka sorkar.
