Jowai : Ka Raij Ialong ynne ka 14 Naisaphra da pyndep ko ya ka lehniam Behdieñkhlam yong ka heiwa da wan sakhi da ki spah ngut ki bru wa wan na kylleiñ ka ri-loom Jaiñtia.
Ya kani ka lehniam ka Raij da sdang nadooh ka Muchai 6 tarik heiwa da pyndep ya kiwa boon ki lehniam kam k Kñia Khang, ka Kñia Bhang, wa kiwi kiwi.
Ha kani ka sngi da wanrah hadooh 9 tylli ki rong næ ki rot wa da wanrah na kylleiñ ki khon ka Raij kam na Wahiajer, Nongkhyllep wa na Ialong.
Ha kani ka sngi da wan sakhi leh da u Montri ka tnat PWD u ma Sniawbhalang Dhar, u MLA ka Umroi u ma Ngaitlang Dhar, u SP ka West Jaiñtia u R. Muthu, u President ka BJP u ma Chibun Lyngdoh, ki MDC ka JHADC wa kiwi kiwi.
Hadien wa da pynhiar ya ki rong ha Aitnar da em ka Taan Bhang wei ka tyngkheiñ bhang kawa mut yow pyneh nasib ya ki khon ka Raij.
Hadien ini da pyndep won ya ka yasleit hapyrdi u khynroo ka Khliehchnong wa ka Luti Tuber heiwa kamwa jooh man khlieh snem da jop da u khynroo ka Khliehchnong.
Manda dep na Aitnar da pyndep won ya ka Kñia Duwan ha Khlooblai ka Raij Ialong.
Ha kani ka sngi u ma Sniawbhalang Dhar kam u kongsan hei klam yong oo da e khublei u ya waroh wei da kular u leh wow e yarap hadooh T. 1 lak cha ka Raij Ialong.
Discussion about this post