Ynne ka sngi, ki khon ka Ñiamtre wa em hapoh ka Raij Jowai hei yahkhmat u Dolloi kam u khlieh ka ñiam khlieh ka Elaka chirup u Pator, Ki Soo Langdoh wa ki Wasan Waheh yong ki Sooraij Soolangdoh da pyndep ki ya ka lehniam kñia e ngooh yow Syiem Pyrthat wa yow Mon Ryngklaw kawa da man ha ka Duwan Kñia wa em hei doh i pran u Loomkyndong.
Ka Langdoh chwa wow mih li kñia da siang ko i ngooh i dem, i pynap Blai pynap Syiem neibynta wow laibait lairyntih ki kaam niam wei suk i saaiñ ka chnong ka Raij neitæ pynbood won i pait i bichaar ya ki le tylli ki tpu niam wa da chet da ka Langdoh.
Kani toh ka lehniam wa hap u pyndep chi tayaw chwa wow poi ki sngi yong ka Chaad Ñiam Behdieñkhlam hapoh ka Raij Jowai wei ka yurim yong ka toh wow e ngooh makhane yei kyrkhu wa da yoh wei wow kyrpaad kyrpon leh yow nang yoh chooh ki Soo Langdoh Soo Raij yei imsuk imsaiñ im miat im bha dei wow lait na kiwa boon ki rukom tynjooh yong ka pyrthai mariang.
U Wh. Puramon Kynjin, Dolloi hawa e kyntien heiyatoh wa i pynkhreh pynkhrum ya ka Behdeiñkhlam wa ya ki lehniam næ knia e ngooh waphær, da ong u man iwa sñiawsuk wa ha uni u snem da yoh yei pyrthai mynder wa miat iwa ki khon ka Raij u yoh ki u ya embyntalang hei pyndep yei mon i khe u Trekirot ha ki Soo Sngi-Le Yaw.
Chooh chooh da ong u leh kam wa ki sarin yong I lehñiam waphær neibynta i burom U Trekirot, ki Blai ki Syiem man kiwa miat wabha kyrmen yooluti u leh wa ka Behdieñkhlam yong uni u snem u man ko kawa phooh wa phieñ deilang wei kyrkhu khyrdoh ha ki liang waroh.
