Ka Raij Jowai ha ka yurim i sikai niam wa da pynjooh na warim wow e i sñiawngooh makhane yei kyrkhu wa da yoh, wei wow kyrpaad kyrpon na u Trekirot wa ki Blai ki Syiem yow nang yoh chooh ka Raij ka chnong yei imsuk imsaiñ, ynne ka sngi Muchai 20 tarik Naiynru da pyndep ko ya ka Kñia Khang kawi na ki lehniam næ kñia e ngooh watoh u leh u pyndep chwa wow poi ki Soo Sngi Le Yaw yong ka Chaad Niam Behdieñkhlam hapoh ka Raij ka chnong.
Katkam ka hukum adong ñiam da ong wa ki Soodwar Sooluti wa ka Tawiar Takan toh ki Blai Chnong-Blai Raij wa da pynchong pynthiah nadooh wa sdang ka Raij ka chnong heiwa i em yong ki ha man ki phang ka chnong ka thaw khang kah, beh pakhot panang ki ya ka wasih waroi wa ang wahiap, wahær wapær wow psiah u mih chapoh ka chnong ka Raij.
Ya kani ka kñia e ngooh e dem, e bhet e bhar ya ki Soodwar Sooluti wa ya ka Tawiar Takan da pyndep haman ki phang yong i thaw wa em ki kiwa kynthup yow Mookhai, Mooralong, Moosniang, Mootong wa ya ka Syiem Myntdu kawa man ka wah wa ker talawiar yei chnong Jowai.
Hadien wa da dep i kñia na man ki phang yong ki Soodwar Sooluti bood won ka bynta wa sah u pyndep ha madan Ryngkaw wa em ha Tpep-Pale.
