Ynne ka sngi, ki wasan waheh, chakri niam ka Raij Jowai hei yahkhmat u Dolloi kam u khlieh ka niam, khlieh ka Elaka da chim ki wow pyndep ya ka lehniam kñia e ngooh wa tip kam ka Kñia Thoh Langdoh næ ka kñia e ngooh yow Blai Langdoh.
Kam wa pynkynmoo, chwa wow poi kani ka sngi, ha ka 26 tarik u Wisu ki chakri niam ka Raij deilang ki Phra Kur Phra Kmai chirup wa ki waheh wasian ka Raij da mih ki chakhmat ka Yaaw ka Syiem wow pyndep ya ka lehniam Kbai Mooknor næ i e wyrta chula hakhmat ka Yaaw ka Syiem wa datoh i por wow sdang noh ka Niam Behdieñkhlam hapoh ka chnong ka Raij.
Katkam ka rukom dustur wa pynjooh sikai ha kani ka sngi Thoh Langdoh næ Kñia Thoh Langdoh ka adong niam ong ko, wym hoi u pooh u deiñ, u pyntakha tamong, u tympiah tympra næ u pyntngit pynjngut yei doh i pran ka Bei Rymaw neibhah kani toh kawi na ki sngi wow pynkhroo yei burom ka Bei Rymaw kawa psa wa pusai wa khat wa kyndup yow bru pyrthai liang wanang.
Hakhmat ka Duwan Kñia wa em u Moo Langdoh, ya ka lehniam ha kani ka step da pyndep da u Sangot Paswet chirrup i synraanlang u Sangot Pasubon wa u Sangot Pakyntein wei katkam ki dak ki chin wa mih da ong wa ka lehniam næ kñia e ngooh ha kani ka step man ko kawa miat wabha.
Ha kani ka step hadien wa da pyndep ya ka lehniam na Kloo Langdoh ka bynta wa bood won yong ka niam wa hap ki Wasan u pyndep ha Yung Langdoh toh ka Thung Sang heiwa ki Wasan u chim ki yow symbe toh symbe saru-sakhia dep tæ bet ki ha kpær i rasa wa em ha chrooh ka yung Langdoh wei deiwa pyndep ya kani ka niam, ki khon ka Raij ka chnong ha ka sngi wabood dahoi u sdang ki yei bet i thung yong ki.
