Ki khon ka Niamtre hapoh ka Raij Mukhla ynne ka sngi da pyndep ki ya ka lehniam Behdieñkhlam ha Aitnar kawa em ha chnong Mukhla.
Ha kani ka sngi chwa wow hiar rah ya ki rong ki rup cha Aitnar da em ka yachem chwa ha Madan Slotmasi heiwa da tympat ya ki Dieñkhlam.
Ha kani ka sngi da wan sakhi da u Dolloi ka Elaka Jowai, u Puramon Kynjing hei emlang u MLA ka Jowai u Wailadmiki Shylla, ki MDC ka JHADC wa kynthup ya u Ailad Bhoi, u Octomewat Lamin wa kiwi kiwi.
Ha kani ka sngi da wanrah 10 tylli ki rong.
Neiliang ka Raij Mukhla ha uni u snem da yaleh ko wow pynduna ya kiwa chimbynta kam wow bood ya ki kyndon yada COVID-19 wei kiwa chimbynta ha kani ka sngi leh toh kiwa dadep chim ya i tika yada COVID-19.
Neiliang u Langdoh ka Raij Mukhla, u Wanbha Lyngdoh da kitbok kitrwiang u ya ki khon ka Raij yow man iwa bha ya ki waroh dei kyrkhu wa i yada na u Trekirot.
Kani ka lehniam Behdieñkhlam toh kawa khaddooh dooh na ki Behdieñkhlam yong uni u snem wa pyndep da ki khon ka Niamtre hapoh Ri-loom Jaiñtia heiwa ya ka Behdieñkhlam wa nyngkong da pyndep da ka Raij Chyrmang ha u Naitung bood won sa kiwi ki Raij nadooh u Naiynñiaw.
