Kiwa kitkaam niam hapoh ka Raij Mukhla na ki 5 tylli ki kur kiwa khut kam ki Waheh Sankur kiwa mihkhmat ya ki kur yong ki, hapoh i yahluti u Pa Langdoh uwa man u khliehdooh yong ka niam ka rukom, ha ka 27 tarik uni u bnai da pyndep ki ya ki knia lehniam khlam u Syiem Khlam wa u Ram Shyllong kiwa man ki Blai wa ri wa sumaar ya ki khon ka Seiñ Raij Mukhla.
Kani ka kñia e ngooh ya kini ki Blai toh kawa jooh leh hapoh ka Raij Mukhla chi sien chi snem hachwa wow hiar rep hiar thung ya ki symbe jhoor, symbe toh wa kiwi kiwi, kamjooh leh kani ka leh niam kñia khlam man ko leh kam ka dak wow khang wow kah ki Blai ki Syiem ya ka kjut ka chitom, ka khlam ka ngooh, ka ksuid wa ki chohnoh yow lait ki u wan tia wan toor chapoh ka chnong ka thaw ka raij ka muluk.
Ki khon ka Seiñ Raij Mukhla kat wym pu dep u kñia e ngooh ia u Syiem Khlam wa u Ram Shyllong, ym pu hoi u thung u tep ya ki symbe toh, symbe jhoor wa kiwi kiwi.
Ya kani ka leh niam kñia khlam da sdang ya ka na yung ka Bei Langdoh “Yung Blai” nadooh 6:00 waje i step deiwa e ngooh e dem wa ka kyntiñ khnong da ki kymphui, hadien won da mih lai kñia cha duwan kñia hapoh Khloo Blai.
Ya kani ka leh niam kñia da kñia da u Maji Niam ka Raij Mukhla uwa na ka kur Sari.
Ini toh katkam i pynlait khubor u Waheh ka kur Sari, u Standbyme Sari.
