Jowai: Ka Raij Mukhla da pyndep ko yei lehniam wa chisien chisnem ha chwa wow thung ya ki symbe jhoor wa boon jait wei ya kani ka lehniam da tip kam ka Syiem Khlam Ram Shyllong.
Ya kani ka lehniam da pynman ha khloo kyntang yong ka Raij Mukhla ha Mukhla Nongrim.
Kani ka lehniam da sdang ya ka nadooh ka por 6:00 waje i step ha yung ka Langdoh ka Raij Mukhla wei pynbood ya ka niam wa dang sah ha khloo kyntang.
Ya kani ka lehniam da pyndep ya ka hapoh i yahkhmat u Pa Langdoh wa ka Bei Langdoh wa ki Rangbah na ki Sankur (Waheh Sankur) wa kynthup ya u Sangot, u Waheh Suna, Waheh Lyngdoh, Waheh Shylla, Waheh Sari, Waheh Khrongle Iung, Maji wa u Chutia hei emlang leh ki khon ki paaid ka Raij Mukhla.
I phang wa kongsan dooh kani ka lehniam toh wow beh ya ka khlam ka ngooh ka kjut ka chitom wa ya kiwa choon wa tooh wa ya kiwi kiwi de wei kamjooh leh wow e ya ka kyrkhu kyrdoh yow bha ka kamai kajih, ka rep ka riang ha ka thung ka tep.
Ha kani ka lehniam da pynemkaam da u kwai u pathi ka sla lamet latang, ki klong ki skoo, u khoo, u syiñ, ka um, ki pyrnah pyrjin, ka sniang kynthai wa u syiar chynrang.
Ha kani ka lehniam da pynemkaam leh ya u ckhen u siej kiwa da chna pynwan dur kam ki syntu iwa mut wa skem ki siej wa u dieñ khnong da u dieñ chyrngan wow man ki kam ki wait ki stieh ki khnam ki ryntieh wow da wow kær ki ya ka Raij ka Muluk na ka khlam ka ngooh ka kjut ka chitom.
Ya kani ka lehniam knia da pyndep ya ka knia da u Maji Ka Raij Mukhla na ka kur Sari hei emlang u Waheh Suna .
Discussion about this post